दोस्रोपटक म्याद थप्दा पनि सकिएन बिर्तामोड–भद्रपुर सडक विस्तार

दोस्रोपटक थपिएको म्याद पुस मसान्तमा सकिँदै, बल्ल ६० प्रतिशत काम 

झापाको मुख्य बजार बिर्तामोडदेखि सदरमुकाम भद्रपुर जाने सडक चार लेनमा विस्तारको काम दुईपटक म्याद थप्दा पनि सकिएको छैन । निर्माण कम्पनीको ढिलासुस्तीका कारण सडक स्तरोन्नति समयमा नसकिएको हो । बिर्तामोड–भद्रपुर सडकअन्तर्गत धौलापुलदेखि भद्रपुरसम्मको ८.४१ किलोमिटर सडकको काम ठेक्का लागेको चार वर्ष पुग्दा पनि सकिएको छैन । निर्माण कम्पनीले सडक निर्माणको ठेक्का लिएर पेटी ठेकेदारमाथि विश्वास गर्दा यो सडक समयमा नसकिएको हो। 

चार लेनको यो सडक ६ माघ ०७७ मा काठमाडौंको एम–एस कन्टेक प्रालिले भ्याटसहित ५८ करोड दुई लाख २८ हजार रुपैयाँमा ठेक्का लिएको थियो । सडक ५ साउन ०७९ मा सक्नुपर्ने गरी ठेक्का सम्झौता भएको थियो । तर, ठेक्का सम्झौता मिति सकिएको २८ महिनामा पनि सडक निर्माणको काम सकिएको छैन ।

सडक डिभिजन कार्यालय दमकका इन्जिनिरियर उज्ज्वल खतिवडाका अनुसार यो सडक निर्माणका लागि दुईपटक म्याद थपिएको छ । दोस्रोपटक थपिएको म्यादको समय पनि एक महिनापछि अर्थात् पुस मसान्तमा सकिँदै छ । दोस्रोपटक थपिएको म्याद सकिनै लाग्दा पनि सडक निर्माणको काम ६० प्रतिशत मात्र भएको इन्जिनियर खतिवडाले बताए । ‘अहिले कामको गति त तीव्र छ । तर, पुस मसान्तभित्र काम सकिँदैन होला । यद्यपि, अहिले सन्तोषजनक काम भइरहेको छ,’ उनले भने, ‘सुरुमा निर्माण कम्पनीले गम्भीर रूपमा लिएन । हामीले पटक–पटक ताकेता गरेपछि अहिले कामले तीव्रता पाएको छ ।’ 

सडक निर्माणमा साइड क्लियर नहुँदा पनि केही समस्या निम्तिएको छ । चार लेनको सडक निर्माण गर्दा चन्द्रगडी बजारमा केही घर भत्कने भएका कारण समस्या निम्तिएको सडक डिभिजन कार्यालय दमकले जनाएको छ । चन्द्रगढीका २१ घरधुरीले भने घर भत्काउने सडक डिभिजनको निर्णयविरुद्ध सर्वोच्च अदालतमा रिटसमेत दायर गरेका छन् । ‘२१ घरधुरीको सन्दर्भमा सर्वोच्चले काम नगर्न÷नगराउन अन्तरिम आदेश दिएको छ । त्यहाँ छाडेर हामी काम अघि बढाउँछौँ,’ खतिवडाले भने, ‘चन्द्रगढी बजारमा अन्य घर पनि छन् । २१ वटा बाहेकमा समस्या छैन । कतिवटा घर र जग्गा पर्छ भनेर भद्रपुर नगरपालिकासँग समन्वय गरिरहेका छौँ । अन्य ठाउँमा खाली गराउने गरी काम थलिसकेका छौँ ।’ 

सदरमुकाम जाने मुख्य सडक समयमा नबन्दा यात्रुले दैनिक कष्ट भोगिरहनुपरेको छ । सदरमुकमा जाँदा स्थानीयले बर्खामा हिलो र हिउँदमा धुलोको सामना गर्नुपर्ने अवस्था छ । ‘यो सडकको काम नसकिँदा हामीले सास्ती भोग्नुपरेको छ । पाँच वर्षदेखि काम अलपत्र छ । काम नसकिँदा धुलो र हिलोले सताएको छ,’ बिर्तामोड–७ का जनार्दन ठाकुर भन्छन्, ‘दुर्घटनाको जोखिम पनि उस्तै छ । काम नगर्ने ठेकेदारलाई काम दिनु भएन । काम समयमा गर्नेलाई मात्र ठेक्का दिनुपर्‍यो ।’