चट्याङबाट एकै दिन १२ जना घाइते

पश्चिम नेपालमा चट्याङबाट एकै दिन १२ जना घाइते भएका छन्। राष्ट्रिय विपत् जोखिम न्यूनीकरण तथा व्यवस्थापन प्राधिकरणका अनुसार सोमबार प्युठान, गुल्मी, जाजरकोट र दैलेखका सात ठाउँमा चट्याङ खसेको हो।

चट्याङबाट दैलखमा ६, जाजरकोटमा तीन, गुल्मीमा दुई र प्युठानमा एकजना घाइते भएका छन्।

दैलेखको भगवतीमाई गाउँपालिका– ५ साङखोला चौरमा गोठाला गएका ६ बालबालिका चट्याङमा परेका हुन्। जाजरकोटको बारेकोट गाउँपालिका– १ धौलाकोटमा चट्याङ खस्दा गर्भवतीसहित तीन महिला घाइते भएका छन्। उनीहरूको  प्राथमिक स्वास्थ्य केन्द्र बारेकोटमा उपचार भइरहेको छ।

उता गुल्मीको मदाने गाउँपालिका– १ अगलुङ र वडा नम्बर ५ पातलकटेरीमा घरमा चट्याङ खस्दा दुई महिला घाइते भएका छन्। उनीहरूको स्थानीय अस्पतालमा उपचार भइरहेको छ।

त्यस्तै, प्युठानको नौबहिनी गाउँपालिका– ७ स्याउलेमा चट्याङ खस्दा एकजना घाइते भएका छन्। उनको दाङको घोराहीमा उपचार भइरहेको छ।