कर्णाली याक्सले भित्र्यायो बाबर हायतलाई

हिमालयन बिल्डर्स एन्ड इन्जिनियर्सको स्वामित्वमा रहेका कर्णाली याक्सले दोस्रो विदेशी खेलाडीको रूपमा हङकङका ब्याटर बाबर हायतलाई अनुबन्ध गरेको छ। बुधबार कर्णाली याक्सले आगामी नेपाल प्रिमियर लिग (एनपिएल)का लागि ३२ वर्षीय खेलाडीलाई भित्र्याएकाे हाे । योसँगै दायाँहाते ब्याटर बाबर हायतले आगामी लिगमा कर्णाली याक्सको प्रतिनिधित्व गर्नेछन् ।

बाबरले हङकङका लागि ७९ टी–२० आई खेलमा एक हजार ९१० रन बनाएका छन् । उनको स्ट्राइक रेट १३२.२७ छ। हङकङका लागि उनले दुई शतक र १० अर्धशतक बनाएका छन् । उनले सन् २०२४ मै नेपालविरुद्ध नै ११० रन बनाएका थिए । बाबरको आगमनले टोली थप मजबुत भएको कर्णाली याक्सका प्रशिक्षक ज्ञानेन्द्र मल्लले बताए ।

‘बाबर निकै अनुभवी खेलाडी हुन्। उनको आगमनले टोली थप मजबुत भएको मानेको छु,’ प्रशिक्षक मल्लले भने, ‘उनले नेपालमा धेरै खेल खेलिसकेका छन्। त्यो अनुभव एनपिएलमा देखिने आशा गर्छाैँ।’ कर्णालीले पहिलो विदेशी खेलाडीको रूपमा यसअघि पाकिस्तानका २८ वर्षीय अलराउन्डर मोहम्मद हुसैन तलातलाई अनुबन्ध गरिसकेको छ ।

तलातले पाकिस्तानबाट १८ टी–२० आई खेलेका छन्। जसमा ३९४ रन बनाएका छन्। उनले सन् २०१९ मा वेस्ट इन्डिजविरुद्ध खेल्दै टी–२० आईमा डेब्यु गरेका थिए। कर्णाली याक्सको मार्की खेलाडीमा राष्ट्रिय टिमका अलराउन्डर सोमपाल कामी छन्।

१५ मंसिरदेखि ६ पुससम्म हुने प्रतियोगिताका लागि कर्णाली याक्सले अक्सनबाट ‘ए’ श्रेणीका राष्ट्रिय टोलीका गुल्सन झा, देव खनाल र नन्दन यावदलाई समावेश गरेको छ। त्यस्तै, ‘बी’ श्रेणीका अर्जुन घर्तीसहित रित गौतम, मौसम ढकाल र भुवन कार्की छन्। ‘सी’ श्रेणीबाट दीपेन्द्र रावत र युनिशविक्रमसिंह ठकुरीसँगै दीपक डुम्रे छन्। कर्णालीले मंगलबार मात्रै हस्पिटालिटी पार्टनरमा होटेल हिल्टनसँग सम्झौता गरिसकेको छ।