सिराहाको नवराजपुर गाउँपालिका– १ भगवतीपुरबाट प्रहरीले प्रतिबन्धित लागुऔषधसहित एक व्यक्तिलाई पक्राउ गरेको छ । जिल्ला प्रहरी कार्यालय सिराहाका अनुसार सिराहाको लक्ष्मीपुरपतारी गाउँपालिका– ६ सीतापुर बस्ने करिब ४० वर्षीय भगत यादवलाई सोमबार साँझ बोरामा लुकाएर ल्याउँदै गरेको प्रतिबन्धित लागुऔषधसहित पक्राउ गरिएको हो ।
प्लास्टिकको बोरा बोकेर भगवतीपुर हुँदै सीतापुरतर्फ आउँदै गरेका यादवलाई रोकेर बोराको जाँच गर्दा लागुऔषध बरामद भएपछि तत्काल नियन्त्रणमा लिइएको सिराहा प्रहरीका सूचना अधिकारी प्रहरी नायब उपरीक्षक वीरेन्द्रकुमार पासवानले जानकारी दिए ।
उनका अनुसार पक्राउ परेका यादवले बोकेको बोरामा एक सय एमएलको ८४ बोतल कोडिन फस्फेट विक्सिडन सिरप, एक सय एक एम्पुल फेनार्गन, ९५ एम्पुल डाइजिपाम र ९८ एम्पुल बुप्रेनर्फिन बरामद भएको छ। लागुऔषधसहित नियन्त्रणमा लिइएका यादवलाई इलाका प्रहरी कार्यालय लहानको हिरासतमा राखेर थप अनुसन्धान भइरहेको प्रहरीले जनाएको छ ।