- वि.सं २o८o माघ २३ मंगलबार
महालक्ष्मी नगरपालिका–१०, लाँकुरी भञ्ज्याङस्थित सामुदायिक वनमा जथाभावी रूख कटान र डोजर चलाएको पाइएको छ । वनको संरक्षण गर्नुपर्ने निकाय माथिल्लो पात्ले सामुदायिक वन उपभोक्ता समितिले नै अनधिकृत रूपमा रूख र डोजर चलाएको हो ।
पात्ले सामुदायिक वनमा विनास्वीकृति रूख कटान भइरहेको उजुरीपछि जिल्ला डिभिजन वन कार्यालय ललितपुुरले अनुगमन गर्ने भएको छ । समितिले एक साताअघि सल्ला, उत्तीस र चिलाउनेका दर्जनभन्दा बढी रूख काटेको उजुरीमा उल्लेख छ ।
स्थानीयवासीले रूख काटिएको बारे डिभिजन वन कार्यालयमा गुनासो तथा उजुरी गरेका छन् । आइतबार डिभिजन वन कार्यालय ललितपुरले रूख कटानबारे समितिलाई पत्राचार गर्दै स्पष्टीकरण सोधेको छ ।
डिभिजन वन कार्यालयका वन अधिकृत सन्तकुमार श्रेष्ठले रूख कटान गरेको गुनासो आएपछि पत्राचार गरिएको र अब निरीक्षण पनि गरिने जानकारी दिए । तर, समितिका अध्यक्ष वीरमान तामाङले रूख कटान नगरिएको दाबी गरे ।
