फेरिँदै पूर्वका पर्यटकीय स्थान

बिदामा पहिले घुमफिरका लागि विदेश रोज्नेहरूले अहिले स्वदेशकै रमणीय स्थलहरू रोज्न थालेका छन्  

विराटनगरका उद्योगी तथा उद्योग संगठन मोरङका पूर्वअध्यक्ष सुयश प्याकुरेल पहिले–पहिले घुमफिर गर्न विदेश जान्थे । तर, आजकाल उनले आफ्नो रुचिमा परिवर्तन ल्याएका छन् । आजकाल उनी चाडबाड र अनुकूल सिजनमा नेपालकै पर्यटकीय गन्तव्य घुम्न र खासगरी हिमाली क्षेत्रको टे«किङमा जान रुचाउँछन् । उनले पटकपटक अन्नपूर्ण क्षेत्रको भ्रमण गरिसकेका छन् ।

विराटनगरका उद्योगी नन्दकिशोर राठी पनि पहिले दसैँको समयमा प्रायः परिवारसहित विदेश घुमफिर गर्न रुचाउँथे । दसैँको वेला केही दिनका लागि उद्योग पनि बन्द हुने र कार्यालय बिदा हुने भएकाले यो समयलाई विदेशका नयाँ नयाँ पर्यटकीय गन्तव्य भ्रमण गरेर रमाउने उनको सोख नै बनिसकेको थियो । तर, आजकाल उनको सोख फेरिएको छ । उनी आजकाल चाडपर्वमा विदेश होइन, सकभर नेपालकै रमणीयस्थल घुम्न रुचाउँछन् । 

विराटनगरका घरानियाँ उद्योगी सुरेन्द्र गोल्छा पनि दसैँको समयमा विदेश भ्रमण गर्न रुचाउँथे । उनले बिदाको समयमा एसियाको मात्र नभएर युरोपका पनि धेरै देश सपरिवार घुमिसकेका छन् । तर, आजकाल गोल्छाले पनि चाडपर्वमा घुमफिरका लागि आफ्नै देशका पर्यटकीयस्थलहरू रोज्ने गरेका छन् । उनले नेपालमा पर्यटन उद्योगको प्रचुर सम्भावना देखेर धनकुटाको राजारानीमा सुविधासम्पन्न पाँचतारे रिसोर्ट खोल्ने तयारी पनि थालेका छन् । 

राठी र गोल्छाजस्तै दसैँ बिदामा विदेश घुमफिर गर्ने उद्योगीहरू विराटनगरमा धेरै छन् । पहिले घुमफिरका लागि विदेश रोज्ने धेरैले आजकाल स्वदेशकै रमणीयस्थानहरूलाई गन्तव्य बनाउन थालेका छन् । उनीहरू अनुकूल सिजनमा मुस्ताङको मुक्तिनाथ, लुम्बिनी, गोरखाको मनकामनालगायत स्थानहरूमा घुमफिर गर्न रुचाउँछन् । यसबाहेक कोशी प्रदेशका प्रसिद्ध धार्मिक पर्यटकीय गन्तव्य खोटाङको हलेसी, ताप्लेजुङको पाथीभरा, इलामको सानो पाथीभरा र सुनसरीको बराहक्षेत्रमा घुमफिरसहित दर्शन गर्न विराटनगरवासी पुग्ने गर्छन् ।

पहिले चाड पर्व र अनुकूल सिजनमा भारतको दार्जिलिङ र सिक्किम घुमफिर गर्न रुचाउने विराटनगरवासी आजकाल इलामको कन्याम, चितवनको देवघाट र नवलपरासीको चारधामलाई प्राथकिता दिन थालेका छन् । आजकाल उत्तरी सिक्किममा रहेको चारधाम जानेक्रम धेरै कम भएको विराटनगरका पर्यटन व्यवसायीहरू बताउँछन् । इलामको ३६ सय मिटर उचाइमा पर्ने रमणीय सन्दकपुर क्षेत्र पनि बिस्तारै विराटनगरवासीको रोजाइमा पर्न थालेको छ । 

धेरैको रुचि होमस्टे
कोशी प्रदेशमा धेरै पर्यटकीय गन्तव्य छन् । तर, सबैतिर राम्रा होटेलहरू छैनन् । धेरै ठाउँमा पर्यटकले चाहेजस्तो खानबस्न पाउँदैनन् । तर, आजकाल स्थानीयवासीबाटै धमाधम होमस्टेहरू सञ्चालन हुनथालेपछि राम्रा र दुर्गम क्षेत्रका पर्यटकीय गन्तव्यहरूमा भिडभाड बढ्न थालेको छ । होमस्टेले गर्दा आजकाल कोशी प्रदेशका धेरै पर्यटकीयस्थलको भ्रमण गर्दा कहाँ बस्ने खाने भन्ने चिन्ता हुँदैन । स्थानियवासीले पर्यटकहरूलाई आफ्नै घरमा राख्छन् ।

धनकुटाको नम्जे, मोरङको जेफाले अनि इलामको श्रीअन्तुमा रहेका होमस्टेहरूमा चाडपर्वको समयमा मात्र नभई अनुकूल सिजनमा घुमफिर गर्नेहरूको लर्को नै लाग्छ । चाडपर्व र गर्मीको समयमा विराटनगरवासीहरू धेरैजसो चिसो हावापानी भएको धनकुटाको नाम्चे र श्रीअन्तुको होमस्टेमा वास बस्न पुग्छन् । 

पर्यटन कार्यालय काँकडभिट्टाका अनुसार पूर्वमा इलामको श्रीअन्तु डाँडा, बरबोटे, ताप्लेजुङको पाथीभरा फेदी, झापाको बाहुनडागी र दमक, सुनसरीको पूर्वकुशहा र इटहरीको खोर्सानेखाप, धनकुटाको नाम्जे, मोरङको जेफाले र राजाराजी, संखुवासभाको खाँदबारी आदि पर्यटकीय स्थानमा होमस्टेहरू सञ्चालनमा आइसकेका छन् । सञ्चालनमा आएका होमस्टेहरू केही निजी र धेरै सामुदायिक भनेर दर्ता भएका छन् । नेपालको पहाडी क्षेत्रको सौन्दर्य भारतको सिमला, मनाली, दार्जिलिङ र कास्मिरभन्दा कम नभएकाले भारत घुमफिर गर्न जाने विराटनगरेहरू आजकाल नेपालकै पहाडी क्षेत्र घुम्न थालेको पर्यटन व्यवसायी भवेश श्रेष्ठ बताउँछन् । उनका अनुसार नेपालका पहाडी क्षेत्रका प्राकृतिक रूपले रमणीय पर्यटकीय गन्तव्यहरू भारतीयहरूको समेत रोजाइमा पर्न थालेको छ । आजकाल सीमाक्षेत्रमा पर्ने बिहार र बंगाल राज्यका भारतीयहरू पनि चाडपर्व र अनुकूल सिजनमा कोशी प्रदेशका पहाडी क्षेत्रमा प्रशस्त घुमफिर गर्न आउने गरेका छन् ।

आकर्षणमा फनपार्क र सिमसार क्षेत्र
आजकाल मध्यमवर्गीय मात्र नभई निम्नमध्यम वर्गीय र निम्नवर्गीय परिवारका सदस्यहरूले चाडपर्व र अनुकूल समयमा फनपार्क र सिमसार क्षेत्रको घुमफिरलाई पनि गन्तव्य बनाउन थालेका छन् । चाडपर्वको समयमा त विभिन्न स्थानमा रहेका फनपार्कहरूमा सपरिवार घुमफिर गरेर खानपान गर्नेहरूको घुइँचो नै लाग्छ । विराटनगरको कटहरी, पुष्पलाल चोक र हाटखोला चोकमा रहेका पार्कहरूमा विराटनवासी घुमफिरका लागि सपरिवार पुग्ने गरेका छन् । यस्तै, मोरङको सुन्दरहरैँचामा रहेको गोकुलम, बेलवारीमा रहेको ड्रिमल्यान्डदेखि झापाको दमक र सुरुंगामा रहेका फनपार्कहरूमा घुमफिर गर्नेहरूको प्रायः ओइरो नै हुन्छ । यस्तै, सुनसरीका बर्जुताल, मोरङ बेलबारीमा रहेको वेतना सिमसार र उर्लाबारीमा रहेको बेतिनी सिमसार अनि झापाको सुरुंगामा रहेको जामुनखाडी पनि चाडपर्व र बिदाको समयमा घुमफिर गर्ने पर्यटकीय गन्तव्यहरू हुन् ।