घरेलु मैदानमा १–१ को निराशाजनक बराबरी खेलेको नेपालले फिफा विश्वकप २०२६ अन्तर्गत एसियन छनोटको अवे खेलमा आज लाओसको सामना गर्दै छ । नेपाल र लाओस दुवै जित्नैपर्ने दबाबमा छन् । दोस्रो खेलमा दुवै टोलीका लागि बराबरी नतिजा अर्को चरणमा पुग्न पर्याप्त छैन । जितबाहेक अर्को विकल्प नै छैन । यस कारण नेपाल र लाओस जितका लागि नै खेल्नेछन् । लाओस घरेलु समर्थकको साथ नेपाललाई स्तब्ध बनाउने योजनामा छ ।

गत बिहीबार लाओसले दशरथ रंगशालामा ११ हजार समर्थकमाझ नेपाललाई १–१ को बराबरीमा रोक्न सफल भएको थियो । नेपाली राष्ट्रिय फुटबल टोलीका प्रशिक्षक भिन्सेन्जो अल्बर्टाे एनेसले मंगलबार हुने खेलमा आक्रामक खेल्ने र जित निकाल्ने बताएका छन् । ‘अगाडि बढ्न जित्नैपर्छ, हामीलाई गाह्रो छ, तर तयार छौँ,’ इटालियन नागरिक एनेसले सोमबार आयोजित पत्रकार सम्मेलनमा भने, ‘पहिलो खेल निकै खराब रह्यो । दोस्रो खेलमा आक्रामक फुटबल खेल्छौँ र नतिजा प्राप्त गर्नेछौँ ।’ 

सुधारिएको खेल खेल्ने 
सन् २०२६ को विश्वकप अमेरिका, क्यानडा र मेक्सिकोले संयुक्त रूपमा आयोजना गर्दै छन् । सोही विश्वकपमा खेल्ने सपना देखेको नेपालले एसिया क्षेत्रको छनोट पनि खेलिरहेको हो । नेपालका कप्तान किरणकुमार लिम्बूले पहिलो खेलमा भएको गल्तीलाई सुधार गर्दै खेल्ने बताएका छन् । ‘घरेलु मैदानमा हामीले खराब खेल्यौँ, त्यस गल्तीलाई सुधार गर्दै खेल्छौँ,’ किरणले भने, ‘अवे खेलका लागि उत्साहित छौँ । यो खेल जित्दै बडादसैँको समय समर्थकलाई उपहार दिन चाहन्छौँ ।’ 

दशरथ रंगशालामा भएको खेलमा पहिलो हाफमै नेपाल एक गोलले पछि परेको थियो । दोस्रो हाफको सुरुमै अञ्जन विष्टले गोल गर्दा नेपालले हार टारेको थियो । पहिलो हाफमा नेपालले भ्रमणकारी लाओसविरुद्ध एउटै आक्रमण गर्न सकेन । दोस्रो हाफमा नेपालले सुधारिएको प्रदर्शन गरेको थियो । अञ्जनले हरि खड्का र नीराजन रायमाझीको नाममा रहेको १३ गोलको कीर्तिमानी बराबरी गरेका थिए ।  

घरेलु मैदानमा लाओस उत्साहित
लाओसका प्रशिक्षक कन्लाया सिसोमभाङले घरेलु मैदानमाझ नेपालसँग खेल्न उत्साहित भएको बताएका छन् । उनले घरेलु समर्थकमाझ नेपाललाई स्तब्ध पार्ने योजना रहेको सुनाए । यद्यपि, उनी पहिलो खेलमा रातो कार्ड बेहोर्दा प्राविधिक क्षेत्रमा उपलब्ध हुन पाउनेछैनन् । ‘नेपालसँग खेल्न कठिन हुन्छ, तर हामी घरेलु समर्थकमाझ खेल्न उत्साहित छौँ,’ उनले भने । प्रतिस्पर्धामा पहिलो खेलबाट नेपालको रणनीति थाहा भएको र जितका लागि खेल्ने उनले बताए । ‘नेपालको खेल विश्लेषण र अध्ययन गरेका छौँ । पहिलो खेलको गल्ती सुधार गर्दै खेल्छौँ,’ उनले भने । पहिलो खेलमा घाइते भएका कप्तान बौनपाचन बौनकोङ दोस्रो खेलमा उपलब्ध हुनेछैनन् । उनी नेपालविरुद्ध ५९औँ मिनेटमा मैदान छाडेका थिए । प्रशिक्षक कन्लायाले बौनकोङको राम्रो विकल्प रहेकाले समस्या नहुने बताएका छन् । 

फेरिएको नेपाली टोली 
अहिले नेपाली टोली युवा खेलाडीले भरिएको छ । धेरैजसो सिनियर खेलाडी अष्ट्रेलिया पुगेका छन् । टोलीका कप्तान किरण र अञ्जनसँगै रोहित चन्द, अनन्त तामाङ, एरिक विष्ट, मनीष डाँगी र आयुष घलान मात्र अनुभवी हुन् । त्यसबाहेक सबै खेलाडी नयाँ छन् । आवास लामिछाने, लाकेन लिम्बू, सुदीप गुरुङ, दीप कार्की, आशिष चौधरी र सनिश श्रेष्ठले १० खेल पनि खेलेका छैनन् । 

उत्सव राईले लाओसविरुद्ध डेब्यु गरेका थिए । टोलीमा रहेका अभिषेक बराल, आशिष गुरुङ, अञ्जन राई, अमृत श्रेष्ठ, छिरिङ लामा, कृतिशरत्न छुन्जु र सञ्जीव विष्टसहित आठ खेलाडीले डेब्यु गरेका छैनन् । अमृत र सञ्जीव पहिलोपटक टोलीमा स्थान बनाएका हुन् । 

बराबरी भए खेलको निर्णय पेनाल्टीमा 
यस खेल पुनः बराबरीमा टुंगिएको अवस्थामा अवे गोल मान्य नहुने भएको छ । फिफाले यसपटकबाट प्रस्ट जितको नियमावली बनाएको छ । होम एन्ड अवे खेल बराबरी भए पेनाल्टी सुटआउटमा नतिजा निस्कनेछ । अवे गोलको मान्यता नभएका कारण नेपालमाथि दबाब भने हुनेछैन । यद्यपि, अवे समर्थकको दबाब झेल्नुपर्नेछ । फिफाको नियमअनुसार दुवै लेग बराबरीमा सकिए खेल ३० मिनेटको अतिरिक्त समयमा धकेलिनेछ । त्यसमा पनि बराबरी भए खेलको निर्णय पेनाल्टी सुटआउटबाट लिइनेछ । 

आक्रामक फुटबल खेल्छौँ
भिन्सेन्जो अल्बेर्टाे एनेस, प्रशिक्षक, नेपाल
यहाँ आउन पाउँदा खुसी लाग्यो । पहिलो खेलमा लाओसले धेरै सयम खेर फालेको थियो । रेफ्रीको निर्णय पनि हाम्रो पक्षमा थिएन । तर, हामीले उनीहरूलाई मात्र दोष दिन मिल्दैन । पहिलो खेल निकै खराब थियो । यसबाट पाठ सिक्दै हामीले आफैँमा ध्यान केन्द्रित गर्न आवश्यक छ । यो खेल नेपाल र मेरो लागि पनि निकै महत्वपूर्ण छ । अगाडि बढ्ने हो भने हामीले जित्नुपर्छ । यो गाह्रो छ, तर हामी तयार छौँ । हामी आक्रामक फुटबल खेल्छौँ । लाओस पनि आक्रामक हुनेछ । म तिनीहरूलाई सम्मान गर्छु, तर हामीले भोलि सकारात्मक दृष्टिकोण राख्नुपर्छ ।

घरेलु मैदानमा खेल्न उत्साहित छौँ
कन्लाया सिसोमभाङ, प्रशिक्षक, लाओस
हामी कठिन खेलका लागि पर्खिरहेका छौँ । अघिल्लो खेलबाट हामीले धेरै कुरा सिक्यौँ । विश्लेषण र अध्ययन गरेका छौँ । अझ राम्रो गर्ने प्रयास हुनेछ । हामी फ्यान र समर्थकलाई रंगशालामै उपस्थित भइदिन अनुरोध गर्न चाहन्छौँ । हाम्रा एक महत्वपूर्ण खेलाडी घाइते छन् । यसले खेलमा केही असर गर्छ । वर्तमान लाओसको यो टिम राम्रो छ । हामीसँग २३ खेलाडी छन् । हामी टोलीलाई सधैँ प्राथमिकतामा राख्छौँ र राम्रो प्रतिस्थापन पनि छ । आजको खेलका लागि उत्साहित छौँ ।