- वि.सं २o८o असोज १४ आइतबार
नाम्खा गाउँपालिका– ५ को मुचु गाउँमा बिक्री भएको कुहिएको चामल खाद्य व्यवस्था तथा व्यापार कम्पनी लिमिटेडले फिर्ता गरेको छ । असोज ९ गते नयाँ पत्रिका राष्ट्रिय दैनिक अनलाइनमा खाद्य व्यवस्था तथा व्यापार कम्पनीबाट कुहिएको चामल बिक्री भन्ने समाचार प्रकाशित भएपछि फिर्ता भएको हो ।
३२ बोरा कुहिएको चामल नाम्खा गाउँपालिका उपाध्यक्ष तक्दिर लामा र खाद्य व्यवस्था तथा व्यापार कम्पनी सिमकोट शाखाका सुब्बा नवीन आचार्यको रोहवरमा फिर्ता भएको नाम्खा गाउँपालिका– ५ का सम्पा रिन्जिङ तामाङले जानकारी दिए।
कुहिएको चामल खाद्य व्यवस्था तथा व्यापार कम्पनी लिमिटेडले फिर्ता गरेर नयाँ चामल दिनेको तामाङले बताए । ‘अब गाउँपालिका केन्द्र याल्वाङमा आएर राम्रो चामल लिन खाद्य व्यवस्था तथा व्यापार कम्पनीका सुब्बाले भन्नुभएको छ,’ तामाङले भने ।
मुचुको तुम्कोट खोला तर्न क्रममा टिपरवालाले भिजाएपछि यस्तो समस्या भएको खाद्य व्यवस्था तथा व्यापार कम्पनी लिमिटेड सिमकोट शाखाका सुब्बा नवीन आचार्यले बताए । मुचु गाउँमा ६ सय ६४ बोरा चामल बिक्री भएको थियो । ३२ बोरा पानीले भिजेर बिग्रेको चामल फिर्ता गरिसकेको शाखाका सुब्बा आचार्यले बताए ।
नाम्खा गाउँपालिका उपाध्यक्ष तक्दिर लामाको रोहवरमा ३२ बोरा कुहिएको फिर्ता गरेर नयाँ चामल लिन गाउँपालिका केन्द्र याल्वाङ आउन भनेको सुब्बा आचार्यले नयाँ पत्रिकासँग भने । ‘अरू चामल बिग्रेको छैन, तुम्कोट खोला तार्दा टिपरवालाले भिजाएको रहेछ, त्यो चामल बिग्रेको छ,’ उनले भने ।
