मुख्य समाचार प्रिन्ट संस्करण

साढे पाँच वर्षसम्म बनेन सेती प्रादेशिक अस्पतालको भवन, अधुरै भवनबाट ओपिडी सेवा

सम्झौताअनुसार साढे दुई वर्षमा बन्नुपर्ने सेती प्रादेशिक अस्पतालको भवन साढे पाँच वर्षभन्दा बढी समय बित्दासम्म अधुरै छ । निर्माण कम्पनीको लापरबाहीले लामो समयसम्म भवनको काम अलपत्र पर्दा अस्पताललाई भने भवन अभावले सेवा प्रवाहमा समस्या भइरहेको छ । भवन अभाव भएपछि अस्पतालले अधुरो भवनका केही कोठाबाट ओेपिडी सेवा सुरु गरेको छ ।

भवन निर्माणका लागि पाँचौँपटक थप गरिएको अवधि गत २५ असारमा सकिएकाे छ, तर काम सकिएको छैन । अझै करिब १५ प्रतिशत काम बाँकी रहेको संघीय आयोजना कार्यान्वयन एकाइ धनगढीले जनाएको छ । १८ करोड ७४ लाख २८ हजारको लागतमा दुईतले भवन निर्माण गर्न रबिना–थेगिन जेभीसँग २८ कात्तिक ०७४ मा सम्झौता भएको थियो । सम्झौताअनुसार २७ वैशाख ०७७ मै भवन निर्माणको काम सम्पन्न हुनुपर्ने हो ।

वरिष्ठ फिजिसियन डा. शेरबहादुर कमर, प्रवक्ता, सेती प्रादेशिक अस्पताल
हस्तान्तरण नहुँदै भवन प्रयोग गर्न नहुने हो तर अस्पतालका दुवै भवनमा ठाउँ नभएपछि अधुरो भवनबाट केही सेवा सुरु गर्नुपरेको हो । त्यहाँ पानी छैन, शौचालय छैन । तैपनि सेवा सुरु गरेका छौँ ।

झ्याल, ढोका लगाउने, टायल बिच्छ्याउने, रङरोगन गर्ने, शौचालय बनाउने, बिजुलीबत्ती जडान गर्नेलगायत ‘फिनिसिङ’का काम बाँकी रहेका संघीय आयोजना कार्यान्वयन एकाइ धनगढीका सूचना अधिकारी सौरभ कलौनीले बताए । अहिले पनि निर्माण कम्पनीले काममा तदारुकता नदेखाएको उनले बताए ।

‘निर्माण कम्पनीले काम नगर्दा ढिलो भएको हो । बीचमा थोरै समय विद्युतीकरणको डिजाइन परिवर्तनबाहेक ढिलो हुनुपर्ने अरू कारण थिएन ।’ उनले भने, ‘पाँचपटक म्याद थप्दा पनि काम सकिएन । अब समयमै काम पूरा नगरेबाफत ठेकेदारले दैनिक जरिवाना तिरेर काम गर्नुपर्छ ।’ ठेक्का रकमको ०.०५ प्रतिशत दैनिक जरिवाना तोकिएको र छ महिनासम्म त्यसरी पनि काम पूरा नगरे ठेक्का तोडिने उनले बताए । 

भवनमा विद्युतीकरणको डिजाइन परिवर्तन र निर्माण अवधि लम्बिँदा भवनको लागत २१ करोड रुपैयाँ पुगेको छ । तत्कालीन सेती अञ्चल अस्पतालको सेवा विस्तारका लागि सरकारले भवन निर्माणको योजना ल्याएका थियो । सेती अहिले प्रदेशमातहत छ ।

भवनको अभाव भएपछि अस्पतालले अधुरो भवनबाटै ओपिडी सेवा सुरु गरेको छ । केही कोठामा निर्माण कम्पनीले रङरोगनसँगै मार्बल लगाएपछि अस्पतालले हालै ओपिडी सुरु गरेको हो । यसअघि ओपिडी सञ्चालन गर्दै आएको भवन सडकको क्षेत्राधिकारभित्र परेपछि धनगढीको सडक विस्तारका क्रममा भत्काउनु परेकाले अधुरो भवनबाटै सेवा सुरु गरिएको अस्पतालका प्रवक्ता वरिष्ठ फिजिसियन डा. शेरबहादुर कमरले बताए ।

‘हस्तान्तरण नहुँदै भवन प्रयोग गर्न नहुने हो, तर अस्पतालका दुवै भवनमा ठाउँ नभएपछि अधुरो भवनबाट केही सेवा सुरु गर्नुपरेको हो ।’ उनले भने, ‘त्यहाँ पानी छैन, शौचालय छैन । तैपनि सेवा सुरु गरेका छौँ ।’ अस्पतालका दुईवटा भवनमा मेडिकल र सर्जिकल वार्ड सञ्चालन भइरहेका छन् । डायलाइसिस र आइसियूका लागि पनि ठाउँ साँघुरो भएको डा. कमरले बताए ।

‘६–७ वर्ष भइसक्यो, भवन बनेको छैन । भवन अभावले सेवा प्रवाहमा समस्या भइसक्यो ।’ उनले भने, ‘भवन हस्तान्तरण भए आइसियू र डायलाइसिस वार्ड पनि त्यहाँ राख्न सकिन्थ्यो ।’ हस्तान्तरण भए एमआरआई मेसिन पनि नयाँ भवनमा राखिने अस्पतालले जनाएको छ । प्रदेशको रिफरल अस्पतालका रूपमा रहेको सेतीमा सुदूरपश्चिमका पहाडी जिल्लाबाट पनि दैनिक सयौँ बिरामी उपचारका लागि पुग्ने गर्छन् ।