कोसीमा कांग्रेस नेतृत्वको सरकार बनाउने सत्तागठबन्धनको निर्णय

तर, निर्णायक राप्रपा भन्छ– हामी अझै अनिर्णीत छौँ

विश्वासको मत पाउन नसकेर एमाले नेतृत्वको सरकार ढलेसँगै कोसीमा कांग्रेस नेतृत्वको सरकार बनाउन सत्तागठबन्धनमा रहेका दलबीच सहमति जुटेको छ । सोमबार प्रधानमन्त्रीनिवास बालुवाटारमा बसेको गठबन्धनका शीर्ष नेताहरूको बैठकले कांग्रेस कोसी प्रदेश संसदीय दलका नेता उद्धव थापालाई मुख्यमन्त्रीको उम्मेदवार बनाउने निर्णय गरेको हो । 

‘अहिले गठबन्धनभित्र कोसी प्रदेशमा सबैभन्दा ठूलो दल भएकाले कांग्रेसले मुख्यमन्त्रीको दाबी ग¥यो । उसको दाबीअनुसार कांग्रेस कोसीका संसदीय दलका नेता उद्धव थापालाई सत्ता गठबन्धनका तर्फबाट मुख्यमन्त्रीका रूपमा अघि सार्ने निर्णय भएको छ । अपुग सिटसंख्या मिलाएर बहुमत पु¥याउने जिम्मा प्रदेशलाई नै सुम्पिएका छौँ,’ उनले भने । 

हाल गठबन्धनमा सभामुखबाहेक ४६ सांसद छन् । बहुमतका लागि ४७ सांसद चाहिन्छन् । नयाँ सरकार गठनका लागि प्रक्रिया सुरु भए पनि सत्ता गठबन्धनमा सहज बहुमत छैन । कांग्रेस २९, माओवादी १३ (सभामुखसहित), एकीकृत समाजवादी ४ र जसपा १ गरी सत्ता गठबन्धनसँग ४७ सांसद छन् । तर, नयाँ सरकार गठनमा सभामुखको भूमिकाबारे स्पष्ट छैन । सरकार गठन सुनिश्चत गर्न गठबन्धनले राप्रपासँग संवाद अगाडि बढाएको छ । गठबन्धन बैठकमा राप्रपासँग संवाद गरेर सरकार बनाउन प्रदेशका नेतालाई जिम्मा दिइएको छ । प्रदेश सभामा राप्रपाका ६ सांसद छन् । 

कोसीमा निर्णायक रहेको राप्रपा कांगे्रस संसदीय दलका नेता थापाप्रति सकारात्मक भइसकेको छैन । थापा कांग्रेस नेता सिटौलानजिकका नेता मानिन्छन् । झापामा राप्रपा अध्यक्ष राजेन्द्र लिङदेन कांग्रेस नेता सिटौलाको कट्टर प्रतिस्पर्धी नेता हुन् । गत मंसिरको निर्वाचनमा पनि लिङ्देनले सिटौलालाई पराजित गरेका थिए । 

राप्रपाका कोसी प्रदेश संसदीय दलका नेता भक्तिप्रसाद सिटौला स्वयंले आफूलाई मुख्यमन्त्रीको उम्मेदवारका रूपमा अघि सारेका छन् । तर, राप्रपाले कोसीमा सरकार गठनबारे निर्णय गर्ने अधिकार अध्यक्ष लिङदेनलाई दिएको छ ।

राप्रपा अध्यक्ष लिङदेनले भने आफूहरूले कसैलाई किस्तीमा मुख्यमन्त्री बुझाउन नजाने बताए । गठबन्धनबाट अहिलेसम्म पहल नभएको उनको भनाइ छ । ‘हामी अहिलेसम्म अनिर्णीत नै छौँ । औपचारिक रूपमा कुनै दलसँग कुरा भएको छैन । अहिलेसम्म सत्ता गठबन्धनलाई समर्थन गर्नुपर्ने कुनै कारण भेटिएको छैन,’ उनले भने, ‘गठबन्धनका तर्फबाट कुनै पहल पनि भएको छैन । त्यसै किस्तीमा मुख्यमन्त्री पद बुझाउन लाने कुरा पनि भएन ।’माओवादी र जसपाले समर्थन फिर्ता लिएपछि कोसीमा एमालेका मुख्यमन्त्री हिक्मतकुमार कार्र्कीको सरकार संकटमा परेको थियो । शुक्रबार विश्वासको मतको प्रस्तावमा भएको मतदानमा र सहभागी ८९ सांसदमध्ये पक्षमा ४६ र विपक्षमा ४३ मत खसेको थियो । प्रतिपक्षमा रहेका तीन सांसद अनुपस्थित रहे । ४० सिट रहेको एमालेलाई ६ सिट रहेको राप्रपाले समर्थन गरेको थियो । 

जनमतलाई सरकारमा ल्याउने सहमति
सत्ता गठबन्धनले जनमत पार्टीलाई सरकारमा सहभागी बनाउने निर्णय लिएको छ । आइतबार बिहान जनमतका अध्यक्ष सिके राउतलाई बालुवाटार बोलाएर सरकारमा आउन आग्रह गरेका प्रधानमन्त्री प्रचण्डले सोमबार गठबन्धनको बैठकमा जनमतलाई सरकारमा ल्याउनेबारे परामर्श मागेका थिए । बैठकमा जनमतलाई सरकारमा फर्काउन सबै सहमत भएको बैठकमा सहभागी लोसपाका वरिष्ठ नेता शरदसिंह भण्डारीले बताए । ‘जनमतलाई सरकारमा ल्याउन सबै दल सकारात्मक छन् । कुन मन्त्रालय दिएर कसरी मिलाउने, त्यो जिम्मेवारीचाहिँ प्रधानमन्त्रीको हो,’ भण्डारीले भने । एकीकृत समाजवादीका कार्यवाहक अध्यक्ष पाण्डेले भने जनमतले दुई मन्त्रालय मागेको अवस्थामा थप एक राज्यमन्त्री दिएर भए पनि सरकारमा ल्याउने सहमति भएको बताए ।