शिवरात्रिमा राखिएको रोटेपिङ अझै हटेन

पशुपति क्षेत्र विकास कोषले शिवरात्रिका अवसरमा मनोरञ्जनात्मक गतिविधि गर्ने गरी एक साताका लागि भाडामा दिएको वनकालीको करिब दुई रोपनी जग्गा अझै फिर्ता लिएको छैन । यो जग्गामा अझै पनि रोटेपिङसहित व्यापार, मेला चलिरहेको छ । 

शिवरात्रि (६ फागुन )लाई लक्षित गर्दै कोषले वनकाली क्षेत्रको करिब दुई रोपनी जग्गा २० लाख रुपैयाँमा एमएमबिकेएल इभेन्ट्स एन्ड बहुउद्देश्यीय प्रालिलाई भाडामा दिएको थियो । तर, हालसम्म पनि उक्त जग्गा खाली भएको छैन । यहाँ अहिले पनि दैनिकजसो विभिन्न मनोरञ्जनात्मक खेलसहित मेला र बजार लागिरहेको छ । कोषले उक्त कम्पनीलाई एक साताका लागि भाडामा दिए पनि पछि म्याद थपेर एक महिना पुर्‍याएको उल्लेख छ । 

कोषका प्रवक्ता रेवतीरमण अधिकारीले त्यसलाई तत्काल हटाइने बताए । ‘धेरैजसो स्थल खाली गरिसकेका छौँ,’ उनले भने, ‘रोटेपिङलगायत मनोरञ्जनात्मक सामग्री राखेको ठाउँ अब खाली हुन्छ ।’ उनले शिवरात्रिका केही दिनका लागि मात्रै दिएको भाडा आजसम्म लम्ब्याइएकोबारे जानकारी नभएको बताए । 

पशुपतिनाथ क्षेत्रभित्र निर्माण गरिएका अवैध संरचना हटाउन महानगरले निर्देशन दिएको छ । बिहीबार कोषलाई महानगरले २४ घन्टाभित्र अतिक्रमित संरचना हटाउन अल्टिमेटम दिएको हो ।

हाल पशुपति क्षेत्र विकास कोषको संरक्षणमा पशुपतिनाथ परिसर आसपास अवैध संरचना निर्माण तीव्र भइरहेको महानगरको भनाइ छ । बिहीबार महानगरपालिकाको टोली त्यस क्षेत्र पुग्दा यस्ता संरचनाले सडक अवरोध गरेकाले त्यसलाई हटाउन लगेको जनाइएको छ ।