विनाशका बाबजुद युक्रेन अझै जीवन्त र सक्रिय छ : जेलेन्स्की

युक्रेनका राष्ट्रपति भोलोदिमिर जेलेन्स्कीले सबै प्रतिकूलता र विनाश र निराशाका बाबजुद युक्रेन जीवन्त र सक्रिय रहेको बताएका छन्। 

स्थानीय समयअनुसार बुधबार अमेरिकी संसद् सदस्यहरूलाई सम्बोधन गर्दै उनले भने, ‘सबै प्रतिकूलता, विनाश र निराशाका बाबजुद युक्रेन पतन भएको छैन। युक्रेन अझै जीवन्त र सक्रिय छ।’

रुसले युक्रेनमाथि आक्रमण गरेपछि भएको राष्ट्रपति जेलेन्स्कीको पहिलो विदेश भ्रमणका क्रममा उनले भने, ‘अमेरिकी कंग्रेसमा तपाईं र सबै अमेरिकीसँग कुरा गर्न पाउनु ठूलो सम्मानको कुरा हो । सबै बाधाहरू र विनाश र निराशाविरुद्ध, युक्रेन पतन भएको छैन।’ 

उनले थपे, ‘हामीलाई कुनै डर छैन, युक्रेनले आक्रमणको पहिलो चरण जितिसकेको छ। रुसी निरंकुशताले हामीमाथिको नियन्त्रण गुमाइसकेको छ।’ युक्रेनी राष्ट्रपति जेलेन्स्कीले अमेरिकी समकक्षी जो बाइडेनसँगको भेटवार्तापछि अमेरिकी संसदका सदस्यहरूलाई सम्बोधन गरेका हुन्। भेटवार्तामा अमेरिकी राष्ट्रपति वाइडेनले युक्रेनलाई निरन्तर समर्थन गर्ने आश्वासन दिएका थिए। 

जेलेन्स्कीले अमेरिकी संसद्लाई सम्बोधन गर्ने क्रममा युक्रेनमा रुसको युद्धलाई नजरअन्दाज गर्न विश्व निकै अन्तरसम्बन्धित रहेको बताए। ‘समुद्र वा अन्य कुनै कुराले सुरक्षा प्रदान गर्नेछ भन्ने आशामा यो युद्धलाई रोक्न वा स्थगित गर्न सकिँदैन।संयुक्त राज्य अमेरिकादेखि चीनसम्म, युरोपदेखि ल्याटिन अमेरिकासम्म र हरेक देशबाट अस्ट्रेलियासम्म, संसार यति धेरै अन्तरसम्बन्धित र अन्योन्याश्रित छ कि कसैलाई अलग रहन र यस्तो युद्ध जारी रहँदा पनि अझै सुरक्षित महसुस गर्न सकिन्छ,’ उनले भने।  

युक्रेनी जनताका लागि आशाको सन्देश दिँदै उनले  युक्रेनले कहिल्यै आत्मसमर्पण नगर्ने बताए। जेलेन्स्कीले रुसलाई चेतावनी दिँदै भने, ‘रुसीहरूले दिनरात ७० हजार मानिसहरूको सहर कब्जा गरिरहेका छन्, तर बखमुत खडा छ।’

जेलेन्स्कीले युद्धको तीन सय दिनभन्दा बढी भइसक्दा पनि युक्रेनका सैनिकले आफ्नो देशको रक्षा गरिरहेका दाबी गरे। उनले युद्धभूमिमा जित्नका लागि थप हतियारको आवश्यकता रहेको बताए। 

युक्रेन आफ्नो स्वतन्त्रता र अस्तित्वका लागि लडिरहेको बताउँदै जेलेन्स्कीले भने, ‘ती लक्ष्य हासिल गर्न संयुक्त राज्य अमेरिकाको निरन्तर सहयोग आवश्यक रहनेछ।’ 

यसअघि अमेरिकी राष्ट्रपति जो बाइडनले जेलेन्स्कीसँगै एक पत्रकार सम्मेलनमा युक्रेनलाई निरन्तर सहयोग गर्ने आश्वासन दिँदै अमेरिकाले थप १.८ अर्ब अमेरिकी डलरको सहायता प्याकेजअन्तर्गत किभलाई प्याट्रियट क्षेप्यास्त्र प्रतिरक्षा प्रणाली पठाउने घोषणा गरेका थिए।