एकीकृत समाजवादीका अध्यक्ष माधवकुमार नेपालले अरूको शक्तिमा भर पर्दा कमजोर भइने भन्दै गठबन्धनमा मात्र आश्रित नहुन कार्यकर्तालाई निर्देशन दिएका छन् ।
गत वैशाखमा सम्पन्न स्थानीय तह निर्वाचनमा एकीकृत समाजवादीबाट निर्वाचित जनप्रतिनिधिलाई बुधबार राजधानीमा प्रशिक्षण दिँदै नेपालले यस्तो निर्देशन दिएका हुन् । ‘अरूको शक्तिमा मात्र भरपर्दा कमजोर भइन्छ । हामीले आफ्नै शक्तिमा पर गर्नुपर्दछ,’ उनले भने, ‘त्यसै पनि गठबन्धनको धेरै भरोसा छैन । स्थानीय तह निर्वाचनको परिणामले पनि देखाएको छ, हामीले हाम्रै शक्तिमा अघि बढ्नुपर्दछ ।’
अध्यक्ष नेपालले आफ्नो शक्ति बढाउन नसक्ने र आधार बनाउन नसक्नेहरू मात्रै अरूको भरमा पर्ने भन्दै नेकपा समाजवादी आफ्नै शक्तिमा अघि बढ्न सक्ने शक्ति भएको दाबी गरे । साथै उनले अरूका भरमा पर्न थालियो भने सधैँ अरूकै सारथि चाहिने अवस्था आउने पनि बताए ।
