सत्तासाझेदार जनता समाजवादी पार्टीका संघीय परिषद् अध्यक्ष डा. बाबुराम भट्टराईले संसदबाट एमसिसी पारित गराउन साथ नदिने भए तत्काल सरकार छोड्न माओवादी केन्द्रका अध्यक्ष पुष्पकमल दाहाल प्रचण्डलाई आग्रह गरेका छन् । शनिबार काठमाडौंमा आयोजित एक कार्यक्रममा बोल्दै अध्यक्ष भट्टराईले यस्तो आग्रह गरेका हुन् । ‘मेरो विनम्र आग्रह छ, खासगरी मेरा पुराना मित्र प्रचण्डजीलाई । कि त तपाईंले यसलाई साथ दिनुस् र १३८ पुर्याएर पास गर्नुहोस् । होइन भने तपाईं सत्तामा पनि बस्ने, तर पनि मार्ने अनि बाहिर चाहिँ राष्ट्रवाद भित्र चाहिँ राष्ट्रघात गर्न पाईँदैन,’ डा. भट्टराइले भने, ‘पहिलो विकल्प, तपाईंले साथ दिनुहोस्, होइन भने तपाईं जानुहोस् । त्यसको ठाउँमा अर्को आउँछ । हामी बहुमत पुर्याएर पारित गर्छौँ । हाम्रो स्पष्ट धारणा छ ।’
संसदमा उपस्थित संख्याको बहुमतबाट एमसिसी पास गरे त्यो जनतामाथि धोका हुने पनि भट्टराईले बताए । उनले भने, ‘संसदमा ६८ जना भए कोरम पुग्छ । त्यसको आधा ३५ हुन्छ । अनि, ३५ जनाले पारित गर्ने यस्तो महत्वपूर्ण मुद्दा ? हुँदैन । संसद्को अहिलेको संख्या २७५ हो, भलै २७१ संख्या छ । यसको आधा १३८ हुन्छ । १३८ भन्दामाथि पुर्याएर नै यसलाई पास गर्नुपर्छ । त्योभन्दा तल लटरपटर कर्मकाण्ड गरियो भने जनतामाथि धोका हुन्छ । त्यसो गर्न पाइँदैन ।’
भट्टराईले नेपालले चीन, भारत र अमेरिकालगायतका सबै देशको सहयोग लिएर मुलुकको विकास, समृद्धि र दिगो शान्तिका लागि काम गर्नुपर्ने बताए । उनले एमसिसी सम्झौता आफ्ना लागि नभई राष्ट्रको हितमा भएकाले यसलाई पारित गर्न आफू लागि परेको बताए । एमसिसी मुलुकको समृद्धि र विकासका लागि पनि नेपालले पारित गरेर जानुपर्ने भट्टराईको तर्क थियो । उनले एमसिसी पारित नभए नेपाल चीन, भारत र अमेरिकाको भूराजनीतिक चपेटामा पर्ने खतरा रहेको पनि बताए ।
