भारतले मानवीय सहायताअन्तर्गत अफगानिस्तानमा गहुँको ढुवानीका लागि पारगमन उपलब्ध गराउनेसम्बन्धी निर्णय तत्कालै लिन पाकिस्तानलाई दबाब दिएको छ। भारतले अफगानिस्तानमा जीवन बचाउने औषधि र खोपका तीनवटा विमान पठाए पनि ५० हजार टन गहुँ भने पाकिस्तानको सीमामा रोकिएकोे भारतीय सञ्चारमाध्यम द स्टेट्सम्यानले जनाएको छ ।
भारतीय विदेशमन्त्री एस जयशंकरले इरानी समकक्षी होसेन अमिर–अब्दुल्लाहियानसँगको कुराकानीमा गहुँको लागि वैकल्पिक मार्गको बारेमा छलफल गरेका थिए । इरानको चाबहार बन्दरगाह हुँदै गहुँ ढुवानी गर्ने विषयमा छलफल भएको आधिकारिक रूपमा भने कसैले पुष्टि गरेको छैन । भारतले वैकल्पिक उपायको खोजी पनि गर्ने र पाकिस्तानलाई सडक मार्गका लागि पारगमनका लागि दबाब पनि दिने गर्दै आएको छ ।
विदेशमन्त्री जयशंकरले इरानी समकक्षीसँगको टेलिफोन वार्तामा ‘कोभिडका कठिनाइहरू, अफगानिस्तानका चुनौतीहरू, चाबहारको सम्भावनाहरू र इरानी आणविक मुद्दाको जटिलताहरू’का विषयमा छलफल गरेको सार्वजनिक गरेका छन् । भारत सरकारले गहुँलाई चाबहार बन्दरगाहमार्फत ढुवानी गर्दा कन्टेनरको उपलब्धता कम र भाडादर उच्च भएको परिस्थिति सामना गर्नुपर्नेछ । तर, अमेरिकाले घोषणा गरेको प्रतिबन्धका कारण इरानमार्फत गहुँ ढुवानी नगर्न भारतलाई कूटनीतिक अप्ठ्यारो पनि देखिएको छ । योभन्दा पाकिस्तानबाट अफगानिस्तानमा प्रवेश गर्ने बिन्दुहरूमा आवागमन सहज छ । अफगानिस्तानको तालिबान सरकारले भारतीय सहायतालाई स्वीकार गर्दै आएको छ ।
भारतीय एक उच्च अधिकारीले द स्टेट्सम्यानसँग भनेका छन्, ‘आगामी हप्ताहरूमा, हामी गहुँको आपूर्ति र बाँकी चिकित्सा सहायता उपलब्ध गराउन प्रयास गर्नेछौँ । पाकिस्तानबाट सम्भव नभएमा यातायात ढुवानीको मोडालिटीका विषयमा संयुक्त राष्ट्र संघका एजेन्सीहरू र अन्य निकायसँग निरन्तर छलफल गर्नेछौँ । हामी सबै एजेन्सीहरूसँग सम्पर्कमा छौँ ।’
