- इजरायलको केन्द्रीय निर्वाचन समितिले गत हप्ता सम्पन्न आमनिर्वाचनमा धाँधली भएको कुनै प्रमाण नभेटेको बताएको छ
तेलअभिभ/ इजरायलको केन्द्रीय निर्वाचन समितिले गत हप्ता सम्पन्न आमनिर्वाचनको नतिजालाई आधिकारिकता प्रदान गरेको छ । समितिले धाँधली भएको कुनै प्रमाण नभेटेको भन्दै यो निर्णय लिएको बताएको छ । प्रधानमन्त्री बेन्जामिन नेतन्याहु र उनका सहयोगीले पटक–पटक कुनै प्रमाणविना अरब नेतृत्वका दलले सम्भवतः विदेशी सहयोगमा निर्वाचन ‘चोरी’ गरेको दाबी गर्दै आएका छन् ।
समितिले ९ हजार ६९ मतदान केन्द्रहरूको समीक्षा गर्दा निर्वाचनको निष्पक्षतामा आँच आउने वा नतिजा नै परिवर्तन हुने किसिमको कुनै अनियमितता नभेटिएको जनाएको छ । समितिका कार्यवाहक महानिर्देशक डिन लिभ्नेले प्रत्येक उजुरीको छुट्टाछुट्टै छानबिन गरिएको र नतिजाले मतदाताको रोजाइलाई सही रूपमा प्रतिबिम्बित गरेको बताए ।
बुधबार केन्द्रीय निर्वाचन समितिले इजरायलका राष्ट्रपति आइज्याक हर्जोगसमक्ष निर्वाचन नतिजा पेस गर्यो । अब राष्ट्रपतिले विभिन्न राजनीतिक समूहका नेतासँग दुई दिनसम्म परामर्श गर्नेछन् । त्यसपछि गठबन्धन सरकार गठन गर्न सबैभन्दा उपयुक्त उम्मेदवारको चयन गर्नेछन् ।
अक्टोबर २७ मा भएको निर्वाचनमा नेतन्याहु नेतृत्वको गठबन्धनले ५३ संसदीय सिट जितेको छ भने प्रतिद्वन्द्वी गादी आइजेनकोट नेतृत्वको विपक्षी समूहले ४८ सिट प्राप्त गर्यो । त्यस्तै, अरब समुदायको प्रतिनिधित्व गर्ने दल ‘रा’आम’ ‘जोइन्ट लिस्ट’ले कीर्तिमानी १९ सिट जितेको छ ।
१२० सिट रहेको इजरायली संसद् (नेसेट)मा सरकार गठन गर्न ६१ सिटको बहुमत आवश्यक पर्छ । निर्वाचनमा कुनै दलले बहुमत नल्याएको वर्तमान अवस्थामा राष्ट्रिय एकताको सरकार बन्ने वा आइजेनकोट र अरब–नेतृत्वका दलबिच गठबन्धनमध्ये एक विकल्प मात्र बाँकी छ । यदि कसैले पनि सरकार गठन गर्न सक्ने गठबन्धन बनाउन सकेनन् भने इजरायलमा अर्को वर्षको सुरुतिर दोहोर्याएर निर्वाचन गर्नुपर्ने हुन्छ ।
