आइसिसी महिला टी–२० विश्वकप ग्लोबल छनोटमा आयोजक नेपालसहित स्कटल्यान्ड र थाइल्यान्डले सोमबार महŒवपूर्ण खेलमा प्रतिस्पर्धा गर्दै छन् । त्रिवि क्रिकेट मैदानमा समूह ‘बी’को अन्तिम खेलमा नेपालले स्कटल्यान्डको सामना गर्नेछ । यसै समूहमा नेदरल्यान्ड्सले मूलपानी मैदानमा थाइल्यान्डविरुद्ध खेल्नेछ । समूह ‘बी’बाट नेदरल्यान्ड्सले सुपर सिक्समा स्थान पक्का गरिसकेको छ ।
दोस्रो र तेस्रो स्थानका लागि नेपाल, स्कटल्यान्ड र थाइल्यान्डबिच त्रिकोणात्मक भिडन्त हुनेछ । समूह ‘बी’को पाँचौँ टोली जिम्बावे लगातार चार खेलमा हार सामना गरी बाहिरिसकेको छ । नेपाल, स्कटल्यान्ड र थाइल्यान्डमध्ये दुई टोली मात्र सुपर सिक्समा पुग्नेछन् । यसकारण उनीहरूको सम्भावना बराबर छन् । एक किसिमले गर या मरको अवस्थामा प्रतिस्पर्धा हुनेछ । जितले अगाडि बढ्ने मौका मिल्नेछ भने हारले प्रतियोगिताबाट बाहिरिनेछ ।
लगातार तीन खेलमा जित निकालेको नेदरल्यान्ड्सको ६ अंक छ । स्कटल्यान्ड र थाइल्यान्डले तीन खेलमा समान दुई जित र एक हार निकाली ४ अंक जोडेका छन् । रनरेटमा स्कटल्यान्ड दोस्रोे र थाइल्यान्ड तेस्रो स्थानमा छन् । आयोजक नेपाल तीन खेलमा एक जित र दुई हारको नतिजासहित २ अंक बटुली चौथो स्थानमा छ । नेपालले शनिबार टेस्ट राष्ट्र जिम्बावेलाई हराउँदै सुपर सिक्सको आशा जीवितै राखेको हो ।
एसोसिएटमा स्कटल्यान्ड शीर्ष स्थानमा
नेपालले सामना गर्न लागेको स्कटल्यान्ड आइसिसीको एसोसिएट महिला राष्ट्रको टी–२० वरीयतामा शीर्ष स्थानमा छ । पछिल्लो वरीयताअनुसार स्कटल्यान्ड ११औँ स्थानमा छ । एसियाली राष्ट्र नेपाल २१औँ स्थानमा छ । यस अर्थमा नेपालले आफूभन्दा १० स्थान माथि रहेको स्कटल्यान्डविरुद्ध प्रतिस्पर्धा गर्न लागेको हो । फेरि स्कटल्यान्डले एकपटक टी–२० विश्वकप खेलिसकेको छ ।
पछिल्लो संस्करणमा स्कटल्यान्डले विश्वकप खेलेका आधारमा सिधै सन् २०२६ को ग्लोबल छनोटमा स्थान पक्का गरेको हो । गत संस्करणको विश्वकपमा स्कटल्यान्ड समूह चरणबाटै बाहिरिएको थियो । आधिकारिक रूपमा नेपालले टी–२० आईमा स्कटल्यान्डसँग प्रतिस्पर्धा गरेको छैन । यद्यपि, ग्लोबल छनोटका लागि भएको अभ्यास खेलमा नेपाल २७ रनले पराजित भएको थियो । विश्वकपको अनुभव बटुलिसकेको स्कटल्यान्डविरुद्ध नेपालले ब्याटिङ र बलिङमा निकै सुधार गर्नुपर्छ । नेपालले दोस्रो र तेस्रो खेलमा फिल्डिङमा राम्रो सुधार गरेको थियो ।
नेपाली टोलीकी पूर्वकप्तान रुविना क्षेत्रीले स्कटल्यान्डसँगको महत्वपूर्ण खेलमा नेपाललाई अवसर रहेको बताइन् । ‘यो खेलमा नेपाललाई अवसर छ । यस्तो अवसर गुमाउनुहुँदैन,’ रुविनाले भनिन् । यसैगरी जिम्बावेमाथिको जितमा अर्धशतकीय इनिङ्स खेलेकी उपकप्तान पूजा महतो खेलाडीको मनोबल उच्च भएको बताउँछिन् । ‘सुरुका दुई खेलमा पराजित हुँदा दबाबमा थियौँ । जिम्बावेविरुद्ध जित निकालेपछि मनोबल बढेको छ । अन्तिम खेलमा पनि उही लय कायम राख्छौँ,’ उनले भनिन् । जिम्बावेलाई ६ विकेटले हराउँदा पूजाले अन्तिम बलमा चौका प्रहार गर्दै ऐतिहासिक जित दिलाएकी थिइन् ।
पहिलो खेलको नतिजामा निर्भर थाइल्यान्ड
समूह ‘बी’को अन्तिम खेलमा सन् २०२० को विश्वकप खेलेको थाइल्यान्डले भने नेपाल र स्कटल्यान्डबिचको नतिजाका आधारमा प्रतिस्पर्धा गर्नेछ । किनभने स्कटल्यान्डले नेपाललाई हराउँदा थाइल्यान्ड मैदानमा उत्रिनुअघि नै सुपर सिक्समा पुग्नेछ । नेपाल पराजित हुँदा २ अंकमै सीमित हुनेछ । यस्तोमा ४ अंक बटुलेको थाइल्यान्ड प्रतिस्पर्धाअघि नै अगाडि बढ्नेछ ।
तर, नेपालले स्कटल्यान्डलाई हराउँदा थाइल्यान्डलाई समूह विजेता बन्ने अवसर छ । उसले नेदरल्यान्ड्सलाई हराउँदा पनि रनरेटका आधारमा शीर्ष स्थानमा पुग्नेछ । यस्तोमा नेपाल र स्कटल्यान्डको समान ४ अंक हुनेछ । रनरेटका आधारमा यी दुईमध्ये एक टोलीले सुपर सिक्समा स्थान बनाउनेछ । यसै समीकरणका कारण नेपालले सुपर सिक्सको आशा जीवितै राख्न राम्रो रनरेटका साथ स्कटल्यान्डलाई हराउनुपर्ने हुन्छ । हारले नेपालको विश्वकप खेल्ने सपना ग्लोबल छनोटमै सीमित रहनेछ ।
