चारमध्ये दुई खेलाडीले आफ्नै नाममा रहेको कीर्तिमान सुधारेका छन् । दुई खेलाडीले नयाँ कीर्तिमानी राखी स्वर्ण पदक जिते ।
पारा तथा विशेष खेलकुदअन्तर्गत भारोत्तोलनमा मंगलबार चार राष्ट्रिय कीर्तिमान बनेका छन् । चारै कीर्तिमान पुरुषको स्पर्धामा बनेको हो । चारमध्ये दुई खेलाडीले आफ्नै नाममा रहेको कीर्तिमान सुधारेका छन् । दुई खेलाडीले नयाँ कीर्तिमानी राखी स्वर्ण पदक जितेका हुन् । सातदोबाटोस्थित अन्तर्राष्ट्रिय खेलकुद परिसरमा भएको प्रतियोगिताको पुरुष ७२ केजीमाथि बागमतीका आशिष मानन्धरले १४५ केजी भार वहन गर्दै आफ्नै नाममा रहेको रेकर्ड सुधार गरे ।
यसअघि उनको नाममा १३० केजीको कीर्तिमान थियो । कर्णाली प्रदेशका किरणकिशोर सापकोटा दोस्रो र कोशीका सुपर राई तेस्रो भएका छन् । राष्ट्रिय खेलकुद परिषद् (राखेप)को आयोजना तथा राष्ट्रिय पारा भारोत्तोलन खेलकुद संघ नेपालको व्यवस्थापनमा भएको प्रतियोगिताको पुरुष ५९ केजीमा सुदूरपश्चिम प्रदेशका सुरेश विष्टले ८६ केजी तौल उठाउँदै राष्ट्रिय कीर्तिमान बनाए । यसअघि ८५ केजीको कीर्तिमान दीपक तिमल्सिनाको नाममा थियो । कोशीका सोमनाथ राई दोस्रो तथा बागमतीका मानबहादुर राना मगर तेस्रो भएका छन्
पुरुष ६५ केजीमा बागमतीका दीपक खड्काले १०१ केजी वजन उचाल्दै राष्ट्रिय कीर्तिमान राखेका छन् । उनले ठाकुर श्रेष्ठको नाममा रहेको ९० केजीको कीर्तिमान भंग गरेका हुन् । बागमतीका बिरु ढुंगानाले रजत तथा लुम्बिनीका लक्ष्मण नेपालीले कांस्य जितेका छन् । पुरुष ५४ केजीमा बागमतीका ठाकुर श्रेष्ठले १०० केजी भार वहन गर्दै कीर्तिमानी स्वर्ण जिते । उनले आफ्नै नाममा रहेको ९० केजीको कीर्तिमानमा सुधार गरे । गण्डकीका पवन घर्तीमगर दोस्रो तथा बागमतीका दीपक तिमल्सिना तेस्रो स्थानमा रहे ।
४९ केजी पुरुषमा मनीष पहिलो
पुरुष ४९ केजीमा बागमतीका मनीष पुन मगरले स्वर्ण चुमेका छन् । उनले ५० केजी वजन उठाएका छन् । कर्णालीका रूपलाल बस्नेतले रजत तथा कोशीका अजित खातीले कांस्य हात पारे । पुरुष ७२ केजीमुनि बागमतीका राजाराम सिलवाल पहिलो भए । उनले ८० केजी तौल उचाले । लुम्बिनीका नारायण तिमल्सिना दोस्रो तथा बागमतीका रामकाजी मगर तेस्रो भए । दुई दिनसम्म चलेको प्रतियोगितामा मधेशबाहेक ६ प्रदेशका ४२ खेलाडीले प्रतिस्पर्धा गरेका थिए । पुरुषमा ६ र महिलामा तीन गरी नौ स्पर्धामा प्रतिस्पर्धा भएको थियो ।
यसैबीच सुदूरपश्चिम प्रदेशले पारा तथा विशेष खेलकुदअन्तर्गत पुरुष गोलबलको उपाधि मंगलबार जितेको छ । लैनचौरस्थित राष्ट्रिय टेबलटेनिस प्रशिक्षण केन्द्रमा भएको फाइनलमा सुदूरपश्चिमले सानो ठिमी क्लबलाई २४–५ गोलले पराजित ग¥यो । प्रतियोगितामा ललितपुर क्लब तेस्रो भयो । प्रतियोगितामा सहभागी चार टोलीले सुरुमा राउन्ड रोबिन लिगका आधारमा प्रतिस्पर्धा गरेका थिए । लिगका विजेता र उपविजेता पुनः उपाधिका लागि भिडेका थिए ।
