- वि.सं २o७९ भदौ १८ शनिबार
सरकारले एक हजार दुई सय मेगावाटको बुढीगण्डकी जलविद्युत् आयोजना बनाउन कम्पनी स्थापना गरेको छ । ऊर्जा, जलस्रोत तथा सिँचाइ मन्त्रालय, अर्थ मन्त्रालय र नेपाल विद्युत् प्राधिकरण, विद्युत् उत्पादन कम्पनीको सेयर स्वामित्व हुने गरी बुढीगण्डकी जलविद्युत् कम्पनी लिमेटेड नामक पब्लिक कम्पनी स्थापना गरिएको हो ।
कम्पनीको अधिकृत चुक्ता पुँजी २० अर्ब रुपैयाँ राखिएको छ । त्यसमा संस्थापक सेयरधनीले ८० प्रतिशत अर्थात् १६ अर्ब रुपैयाँ लगानी गर्नेछन् । बाँकी रहेको २० प्रतिशत सेयरमा १० प्रतिशत स्थानीय र १० प्रतिशत सर्वसाधारणलाई दिइनेछ ।
संस्थापक सेयर १६ अर्ब रुपैयाँमा ऊर्जा मन्त्रालयको ५० प्रतिशत सेयर हुनेछ । यसैगरी अर्थ मन्त्रालयले ३० प्रतिशत र नेपाल विद्युत् प्राधिकरणले २० प्रतिशत सेयर लगानी गर्नेछ । कम्पनीको एक कित्ता सेयरको मूल्य एक सय रुपैयाँ तोकिएको छ ।
बुढीगण्डकी आयोजना पछिल्लोपटक चीनको गेजुवालाई बनाउन दिइएको थियो । तर, गत चैतमा सरकारले स्वेदशी लगानीमा बनाउने गरी गेजुवा ग्रुप कर्पाेरेसन (सिजिजिसी)बाट उक्त आयोजना खोसेको थियो । त्यसपछि गत असारमा उक्त आयोजना बनाउन कम्पनी खोल्ने गरी मन्त्रिपरिषद्ले निर्णय गरेको थियो । त्यसपछि ऊर्जा मन्त्रालयले बुढीगण्डकी बनाउन कम्पनी नै स्थापना गरेको हो ।
