पाकिस्तानमा बाढी हजारभन्दा बढीको मृत्यु, तीन करोड तीस लाख प्रभावित

पाकिस्तानको विभिन्न भागमा परेको अविरल वर्षासँगै आएको बाढीमा परी एक हजारभन्दा बढीको ज्यान गएको छ भने लाखौँ विस्थापित हुन पुगेका छन् । अहिलेको जलप्रकोपलाई पाकिस्तान सरकारले ‘गम्भीर जलवायु विपत्ति’ भन्दै राष्ट्रिय आपत्काल नै घोषणा गरेको छ । प्रधानमन्त्री सेहवाज सरिफले बेलायतको राजकीय भ्रमण स्थगित गर्दै अन्तर्राष्ट्रिय सहयोग संस्था एवं मित्रराष्ट्रहरूसँग सहयोगको अपिल गरेका छन् । 

पाकिस्तानको ठूलो भूभाग अहिले पानीमा डुबेको छ । बहुमत भूभाग समथर रहेको यो मुलुकको कम्तीमा २० देखि २५ प्रतिशत जमिनलाई बाढीले ढाकेको अनुमान छ । अहिलेको बाढीलाई सन् २०१० मा आएको जलप्रकोपसँग तुलना गरिएको छ । सन् २०१० मा अविरल वर्षाका कारण बाढी आउँदा पाकिस्तानमा दुई हजारभन्दा धेरैको मृत्यु भएको थियो भने २० प्रतिशत भूभाग पूरै जलमग्न बनेको थियो । अहिले आएको बाढीले करिब एकतिहाइ पाकिस्तान ढुबाएको आकलन छ । केही स्थानमा घरलाई नदेखिने गरी पानीले पुरेको र रूखका टुप्पा मात्रै देखिएको प्रत्यक्षीदर्र्शीहरूलाई उद्धृत गर्दै अन्तर्राष्ट्रिय समाचार संस्था सिएनएनले लेखेको छ ।

पाकिस्तानको राष्ट्रिय विपद् व्यवस्थापन प्राधिकरण (एनडिएमए)का अनुसार पाकिस्तानमा गत दुई महिनायता बाढी तथा जल उत्पन्न अन्य प्रकोपबाट एक हजार ३३ जना व्यक्तिको मृत्यु भएको छ भने एक हजार पाँच सय २७ जना घाइते भएका छन् । मर्नेहरूमा तीन सयभन्दा धेरै बालबालिका छन् । एनडिएमएले काबुल, इन्दुस र स्वातलगायत ठस्ला नदीआसपासका केही क्षेत्रमा अझै पनि उच्च बाढीको खतरा रहेको जनाएको छ ।

पछिल्लो २४ घन्टामा मात्रै एक सय १९ जनाको मृत्यु भएको जनाइएको छ । जलप्रकोपबाट खैबर पख्तुन्ख्वा, पन्जाब र सिन्ध प्रान्त सबैभन्दा बढी प्रभावित भएका छन् । अहिलेसम्म सिन्ध प्रान्तमा तीन सय ४७, बलुचिस्तानमा दुई सय ३८ र खैबर पख्तुन्ख्वामा दुई सय २६ जनाको मृत्यु भएको सरकारी तथ्यांकले देखाएको छ । 

बाढीबाट हरेक सातमध्ये एक पाकिस्तानी प्रभावित भएका छन् । सरकारी अधिकारीका अनुसार जलप्रकोपबाट अहिलेसम्म तीन करोड ३० लाख मानिस प्रत्यक्ष रूपले प्रभावित भएका छन् । कम्तीमा १० लाख घरमा क्षति पुगेको छ भने तीन लाखभन्दा धेरै घर पूर्ण रूपले ध्वस्त भएका छन् । एनडिएमएका अनुसार बाढीले करिब १२ लाख बिघाको खेती नष्ट गरेको छ । तीन हजार चार सय ५१ किलोमिटर सडकमा क्षति पुगेको छ भने एक सय ४९ पुल बगाएको छ । अधिकारीहरूले बाढीमा मर्ने चौपायाहरूको संख्या दशाैँ लाख पुग्न सक्ने आकलन गरेका छन् । 

दक्षिण एसियाली क्षेत्रमा वर्षको मौसमलाई बालीनालीको सिँचाइ र तालतलैया पुनरभरणको समयका रूपमा लिइन्छ । तर, यो समयमा हुने अत्यधिक वर्षाले ठूलो विनाश पनि निम्त्याउने गरेको छ । यो वर्ष पाकिस्तानका केही क्षेत्रमा औसतभन्दा करिब आठ गुणासम्म बढी वर्षा भएको छ । सबैभन्दा धेरै वर्षा सिन्ध प्रान्तमा भएको छ । यहाँ अघिल्लो वर्षको औसतभन्दा सात सय ४८ प्रतिशत र बलुचिस्तानमा औसतभन्दा पाँच सय प्रतिशतभन्दा बढी वर्षा भएको छ ।