- वि.सं २o७९ असार ८ बुधबार
जिल्ला समन्वय समिति उदयपुरको प्रमुखमा सत्तारूढ गठबन्धन र प्रतिपक्ष दल नेकपा एमालेबीच प्रतिस्पर्धा हुने भएको छ । आगामी असार ९ गते हुने जिल्ला समन्वय समिति (जिसस) को निर्वाचनमा प्रतिस्पर्धा हुने भएको हो ।
जिसस प्रमुखमा नेपाली कांग्रेस, नेकपा माओवादी माओवादी केन्द्र र नेकपा एकीकृत समाजवादीको गठबन्धनबाट नेकपा एसका गौरबहादुर विश्वकर्माले प्रमुख पदमा उम्मेदवारी दर्ता गरेका छन् । यसैगरी एमालेबाट इन्द्रराज कार्कीले प्रमुखमा उम्मेदवारी दर्ता गरेका छन् ।
यसैगरी उपप्रमुखमा गठबन्धनबाट कांग्रेसका तेजप्रसाद गिरी र एमालेबाट हिमकुमारी विश्वकर्माले उम्मेवारी दिएकी छिन् । केन्द्रीय गठबन्धनअनुसार जिसस उदयपुरमा गठबन्धन गरिएको नेकपा एसका जिल्ला अध्यक्ष राममणि पोखरेलले जानकारी दिए । उनले भने, ‘पार्टी केन्द्रबाटै उदयपुर जिससको प्रमुख नेकपा एसलाई र उपप्रमुख कांग्रेसलाई परेको हो ।’
गठबन्धनको तर्फबाट सदस्यमा कांग्रेसका भीमचन्द्र राई, विष्णु कटुवाल र मञ्जुकुमारी परियारले उम्मेदवारी दिएका छन् । माओवादी केन्द्रबाट इन्द्रबहादुर थापा, गोमा कार्की, विन्दाकुमारी विश्वकर्मा र वेदकुमार राईले उम्मेदवारी दिएका छन् । यता एमालेबाट सदस्यमा गणेशबहादुर श्रेष्ठ, तेजबहादुर थापा, सर्वजित राई, अंगुरा परियार, नारायण राईले उम्मेदवारी दिएका छन् ।
