- वि.सं २o७९ असार १ बुधबार
सहरी विकासमन्त्री रामकुमारी झाँक्रीले बाहिरी चक्रपथ निर्माण कार्यका लागि अहिले कुनै पनि काम हुन नसकेको बताएकी छिन् । बुधबार प्रतिनिधिसभाको बैठकमा आगामी वर्षको विनियोजित बजेटमा सांसदहरूले उठाएको प्रश्नको जवाफ दिँदै मन्त्री झाँक्रीले यस्तो बताएकी हुन् ।
उनले अहिले बनाउने भनिएको ठाउँमा बाहिरी चक्रपथ बन्ने हो कि होइन भन्नेमा अन्योल रहेको पनि बताइन । झाँक्रीले चोभारदेखि सतुंगलसम्मको ६ किलोमिटरमा धेरै ठाँउमा सरकारी भवन बनेको पनि बताइन ।बाहिरी चक्रपथ बनाउने क्षेत्रमा अत्यधिक जग्गाको कित्ताकाट भएको भन्दै झाँक्रीले त्यसको पुनः अध्ययन आवश्यक देखिएको बताइन् ।
झाँक्रीले काठमाडौं उपत्यकामा चारवटा स्याटलाइट सिटी बन्ने भने पनि बन्न नसकेको स्वीकार गरिन् । उनले अघिल्लो सरकारले धेरै गफ गरे पनि काम भने नगरेको जिकिर गरिन् ।
उनले भनिन, ‘बाहिरी चक्रपथबारे हामीले धेरै कुरा गर्याैँ । तर, बाहिरी चक्रपथको प्रक्रिया केही पनि अगाडि बढेको छैन । जुन ठाउँमा बाहिरी चक्रपथ बन्ने भनिएको थियो, त्यो ठाउँबाट बाहिरीचक्रपथ बन्छ कि बन्दैन भन्ने नै टुंगो छैन । चोभारको सुक्खा बन्दरगाहबाट सतुंगलसम्मको ६ किलोमिटर बाटोमा जहाँ बाहिरी चक्रपथ भनेर सर्भे गरिएको थियो, त्यो कैयौँ ठाउँमा सरकारी भवन बनेका छन् । यदि ६ किलोमिटरमा राज्यले मुआब्जा दिने हो भने करिब साढे तीन अर्ब मुआब्जा दिने अवस्था छ । सबै ठाउँमा जग्गाको कित्ताकाट अत्यधिक भएकाले त्यसबारे पुनः अध्ययनको खाँचो देखिएको छ ।’
झाँक्रीले युटिलिटी करिडोरको कानुन संसदमा ल्याउने तयारी रहेको पनि बताइन् । उनले उक्त कानुन बनेमा सडक बन्ने र खन्ने क्रम तत्काल रोकिने बताइन् ।
झाँक्रीले नगर विकास कोषलाई छुट्टै २० अर्बको पुँजी भएको वित्तीय निगम बनाएर नगर विकासको काम गर्ने ऐन ल्याउन लागेको पनि बताइन् ।
