- वि.सं २o८१ पौष ३ बुधबार
घरायसी विवादमा भक्तपुरमा बुबाले छोराको हत्या गरेका छन् । भक्तपुर नगरपालिका– २ स्थित राष्ट्रिय प्रत्यारोपण केन्द्रनजिकै डेरामा बस्ने ६३ वर्षीय दीपबहादुर शाहीले मंगलबार बेलुका छोरा ३२ वर्षीय नरेन्द्रबहादुरको हत्या गरेका हुन्।
झगडा भएपछि तरकारी काट्ने चक्कुले छातीमा हानेका थिए। गम्भीर घाइते भएका उनलाई भक्तपुर अस्पताल लगिएकोमा मृत घोषणा गरिएको थियो । दीपबहादुरलाई मंगलबार बेलुका नै नियन्त्रणमा लिइएको भक्तपुर प्रहरीका डिएसपी ढुण्डीराज नेउपानेले बताए ।
अछामको कमलनगर नगरपालिका– ६ स्थायी घर भएका उनीहरू कुनै पेसामा आबद्ध थिएनन् । नरेन्द्रबहादुरकी श्रीमतीले भारतबाट पठाएको पैसाले उनीहरूले खर्च चलाउँदै आएका थिए। आरोपी दीपबहादुर विक्षिप्त अवस्थामा रहेकाले हत्याको कारणबारे केही बताएका छैनन्।
