स्थानीय तह निर्वाचन : ११ र १२ वैशाखमा  उम्मेदवारको मनोनयन

निर्वाचन आयोगले एकै चरणमा हुन लागेको स्थानीय चुनावका लागि निर्वाचन कार्यक्रम स्वीकृत गरेको छ । आगामी ३० वैशाखमा हुने निर्वाचनका लागि मनोनयनपत्र दर्तादेखि मतदानसम्मको निर्वाचन कार्यक्रम शुक्रबार स्वीकृत भएको आयोगले जनाएको छ । चुनावसँग सम्बन्धित सम्पूर्ण काम निर्वाचन अधिकृतको कार्यालयमा हुनेछ । 

आयोगको निर्वाचन कार्यतालिकामा ११ र १२ वैशाखमा उम्मेदवारको मनोनयनपत्र दर्ता, १२ वैशाखमै मनोनयन दर्ता भएका उम्मेदवारको सूची प्रकाशन र १३ वैशाखमा उम्मेदवारको विरोधमा उजुरी दिने तय भएको छ । बिहान १० बजेदेखि साँझ ५ बजेसम्म उम्मेदवारको मनोनयन दर्ताको समय छ । 

यसैगरी, १४ र १५ वैशाखमा मनोनयनपत्र जाँच गर्ने तथा उजुरीउपर जाँचबुझ गरी निर्णय गर्ने, १५ वैशाखमा मनोनयन भएका उम्मेदवारको नामावली प्रकाशन गर्ने कार्यक्रम स्वीकृत भएको आयोग प्रवक्ता शालिग्राम शर्मा पौडेलले बताए । 

यसैगरी, १६ वैशाखमा उम्मेदवारले नाम फिर्ता लिने र उम्मेदवारको अन्तिम नामावली प्रकाशन गर्ने तथा १७ वैशाखमा उम्मेदवारलाई निर्वाचन चिह्न प्रदान गर्ने कार्यक्रम छ । चुनावसँग सम्बन्धित सम्पूर्ण काम निर्वाचन अधिकृतको कार्यालयमा हुनेछ । 

आयोगले जिल्ला तथा वडाबाट त्रुटि सच्याएर आयोगमा आएको अन्तिम मतदाता नामावलीलाई जाँच गरी संशोधनसहितको अन्तिम मतदाता नामावली र मुख्य निर्वाचन अधिकृतको अन्तिम नामावली १३ चैतमा सार्वजनिक गर्ने गरी तयारी गरेको छ । त्यसैगरी, आयोगले कर्मचारी सरुवा तथा पदस्थापन १५ चैतअगावै गर्नका लागि प्रधानमन्त्री तथा मन्त्रिपरिषद्को कार्यालयलाई निर्देशन दिएको छ । 

बिहीबार मात्र आयोगले तयार पारेको निर्वाचन आचारसंहिता, २०७८ राजपत्रमा प्रकाशित भएको थियो । आयोगले १५ चैतदेखि निर्वाचन आचारसंहिता लागू गर्ने गरी तयार गरिरहेको छ । आचारसंहितामा उम्मेदवार बन्न चाहने जनप्रतिनिधिले पेस्की र बेरुजु फस्र्योट गर्नुपर्ने र मनोनयनअगाडि राजीनामा दिनुपर्नेलगायत विषय छन् । 

स्थानीय चुनावका लागि जिल्ला–जिल्लामा शक्तिसन्तुलन बुझ्दै कांग्रेस

१५ चैतसम्म जिल्लाको वस्तुस्थिति बुझ्ने, सँगसँगै उम्मेदवारका आकांक्षी पहिचान गर्ने

कांग्रेसले जिल्लाबाट मगाएको रिपोर्ट

• मतदाताको (पुराना मतदाताको अवस्थासहित नयाँ थपिएका मतदाता) विवरण
• पाँच वर्षमा कांग्रेसको प्रभाव र कार्यकर्ताको अवस्था
• कम्युनिस्ट पार्टीमा फुटपछि कांग्रेसको अवस्था 

आसन्न स्थानीय तहको निर्वाचनका लागि रणनीति बनाउन कांग्रेसले हरेक जिल्लाको शक्तिसन्तुलन बुझ्ने भएको छ । कांग्रेस केन्द्रीय कार्यालयले ७७ वटै जिल्लालाई शुक्रबार परिपत्र गरेर जिल्लाको राजनीतिक वस्तुस्थिति र पार्टीको शक्ति १५ चैतभित्र पठाउन भनेको छ । 

राप्रपाले बनायो चुनावी कार्ययोजना

२८ चैतदेखि घरदैलो अभियान, उम्मेदवार बन्न लोकप्रिय र उच्च नैतिक चरित्र भएको हुनुपर्ने

राप्रपामा वडा तहको उम्मेदवार छनोट सम्बन्धित जिल्ला अध्यक्षको नेतृत्वमा गठित उम्मेदवार छनोट समितिले गर्नेछ । नगरपालिका प्रमुख, उपप्रमुख र गाउँपालिका अध्यक्ष र उपाध्यक्षको उम्मेदवारी सम्बन्धित प्रदेश अध्यक्षको नेतृत्वमा गठित उम्मेदवार छनोट समितिले निर्णय गर्नेछ । उपमहानगरपालिका, महानगरपालिकाका प्रमुख, उपप्रमुख केन्द्रले छनोट गर्ने राप्रपाको निर्णय छ ।

निर्वाचनलाई उपयोग गरेर जाने विप्लवको प्रस्ताव

नेपाल कम्युनिस्ट पार्टी (नेकपा)का महासचिव नेत्रविक्रम चन्द विप्लवले स्थानीय तहको निर्वाचनमा भाग लिने प्रस्तावसहितको राजनीतिक प्रतिवेदन पार्टी केन्द्रीय कमिटीमा पेस गरेका छन् । शुक्रबारबाट कपिलवस्तुमा सुरु भएको केन्द्रीय कमिटी बैठकमा पेस गरेको राजनीतिक प्रस्तावमा विप्लवले निर्वाचनलाई उपयोग गरेर जानुपर्ने मत राखेका छन् । तर, स्थानीय तह निर्वाचनमा सहभागी हुने वा बहिष्कार गर्ने भन्नेबारे बैठकले निर्णय गर्नेछ ।