जसपा बैठक : एमसिसीबारे शनिबार छलफल, भट्टराई पक्षको दबाबपछि नेतृत्व प्रणालीको एजेन्डा थप

जनता समाजवादी पार्टी (जसपा) ले अमेरिकी सहयोग परियोजना एमसिसीबारे शनिबारसम्म आफ्नो आधिकारिक धारणा बनाउने भएको छ । एमसिसीलगायत समसामयिक राजनीतिको सम्बन्धमा छलफल गर्न जसपाले बोलाएको केन्द्रीय कार्यकारिणी बैठकमा शुक्रबार नेताहरूलाई एमसिसी सम्झौता र त्यससम्बन्धी जानकारीमूलक पुस्तिकासमेत वितरण गरिएको छ । कार्यकारिणी सदस्यहरूलाई सम्झौता अध्ययन गरेर शनिबारको बैठकमा आउन भनिएको कार्यकारिणी सदस्य प्रशान्त सिंहले बताए । 

शनिबारको बैठकमा एमसिसीको विषयमा कार्यकारिणी सदस्यले आफ्नो धारणा राख्ने र पार्टीले आधिकारिक धारणा बनाउने उनले बताए । शनिबार एमसिसीको विषयमा जानकार नेताहरूबाट बैठकमा ब्रिफिङसमेत हुनेछ ।

एमसिसीको बारेमा सत्तारुढ दलहरूले आफ्नो धारणा प्रष्ट पारे पनि जसपाले आधिकारिक धारणा बनाइसकेको छैन । संघीय परिषद् अध्यक्ष डा. बाबुराम भट्टराई र अध्यक्ष उपेन्द्र यादवबीच नै एमसिसीको विषयमा फरक मत छ। भट्टराईले एमसिसी संसदबाट पारित गर्नुपर्ने बताउँदै आएका छन् भने यादव मौन छन् ।

शुक्रबारको बैठकमा एजेन्डा र स्थानीय निर्वाचन र पार्टी दर्ताको विषयमा मात्र छलफल भएको जसपा कार्यकारिणी इस्तियाक राईले जानकारी दिए । ‘बैठकमा धेरै छलफल भएन । एजेन्डा र स्थानीय तह निर्वाचनका लागि पार्टी दर्ताको विषयमा मात्र प्रवेश गरेका छौँ’, उनले भने । 

एजेन्डा थप्न दबाब
बैठकमा छलफलका लागि ११ वटा एजेन्डा प्रस्तुत गरिएको छ । बैठकमा एमसिसी, पार्टीको विधान अधिवेशन, संघीय परिषद् र केन्द्रीय समितिको बैठक, नेतृत्व प्रणालीबारे  र मन्त्रीहरूको कार्यसमीक्षालगायतका एजेन्डाका विषयमा छलफल हुनेछ । 
बैठकमा अध्यक्ष यादवले सुरुमा तीनवटा एजेन्डा मात्रै प्रस्तुत गरेका थिए । यादवले स्थानीय निर्वाचन र पार्टी दर्ता, एमसिसी र देशको वर्तमान राजनीतिक परिस्थितिको विषयमा छलफल गर्ने भन्दै बैठक सुरु गरेका थिए । तर ती एजेन्डा अपुग रहेको भन्दै बैठकमा संघीय परिषद अध्यक्ष डा. बाबुराम भट्टराई पक्षका कार्यकारिणी सदस्यहरूले आवाज उठाएका थिए । 

त्यसपछि अध्यक्ष यादवले समय छोटो भएकाले समसामयिक विषयमा तत्काल धारणा बनाउन बैठक बोलाइएको बताएका थिए । ‘अहिले वर्तमान राजनीतिको विषयमा छलफल गरौँ । समय कम छ । सबै एजेन्डा राख्दा बैठक लम्बिन सक्छ । यो बैठकबाट एमसिसीको विषयमा धारणा बनाउँ,’ यादवको भनाइ उदृत गर्दै एक नेताले भने । जवाफमा बैठक लामो भए पनि एजेन्डा थपेर काम गर्नुपर्ने भन्दै कार्यकारिणी सदस्यहरूले आवाज उठाएका थिए । 

एजेन्डा निर्धारणकै लागि करिब २ घण्टा बैठकमा छलफल भएको थियो । त्यसपछि संगठनात्मक कार्यसमीक्षा र समायोजन, केन्द्रीय कार्यकारिणीमा पदपूर्ति,केन्द्रीय कार्यकारिणीको पदनाम र कार्य विभाजन, पार्टीको विधान अधिवेशन, संघीय परिषद् र केन्द्रीय समितिको बैठक ,नेतृत्व प्रणाली, सुज अभियानको समीक्षा र मन्त्रीहरूको कार्यसमीक्षालाई एजेन्डामा थप गरिएको थियो ।

जसपामा नेतृत्वको विषयलाई लिएर यादव र भट्टराईबीच दुरी बढिरहेको वेला कार्यकारिणी समिति बैठक बसेको हो । भट्टराई पक्षले महन्थ ठाकुर पार्टीबाट अलग भएपछि खाली रहेको अध्यक्ष र अन्य पदमा पदपूर्ति हुनुपर्ने बताउँदै आएको छ । तर यादवले भने विशिष्ट परिस्थितिमा दुई अध्यक्षको व्यवस्था गरिएको भए पनि अब आवश्यक नरहेको बताउँदै आएका छन् । भट्टराई पक्षले पार्टीको केन्द्रीय समिति बैठक बोलाउन पनि यादवलाई दबाब दिँदै आएको छ ।