- वि.सं २o७८ माघ २१ शुक्रबार
नेप्सेको प्रमुख कार्यकारी अधिकृतमा कृष्णबहादुर कार्की नियुक्त भएका छन् । १७ माघमा बसेको मन्त्रिपरिषद्को बैठकले नेप्सेको प्रमुखका रूपमा कार्कीलाई चार वर्षका लागि नियुक्ति गरेको हो ।
यसअघि नेपाल सरकारका उपसचिवबाट अवकाश पाएका कार्की पछिल्लो समय बुढीगण्डकी जलविद्युत् आयोजनाका संयोजक थिए । ‘कारोबार व्यवस्थापन प्रणाली (टिएमएस) देखि बजारका विविध पक्षमा सुधार गर्नुपर्नेछ, त्यहीमा ध्यान दिनेछु,’ कार्कीले भने ।
यसअघिका प्रमुख चन्द्रसिंह साउदले सर्वोत्तम सिमेन्ट प्रकरणमा मुछिएसँगै राजीनामा दिएका थिए । साउदले व्यक्तिगत लगानी कम्पनीमार्फत प्रत्यक्ष रूपमा र अन्य कम्पनीमार्फत समेत सेयर बजारमा लगानी गरेको समाचार नयाँ पत्रिकाले प्रकाशित गरेको थियो । मन्त्रिपरिषद्मा कार्कीसँगै डा. केशवप्रसाद श्रेष्ठ र रमेश भण्डारीको नाम सिफारिस भएको थियो ।
