- वि.सं २o८१ बैशाख २० बिहीबार
सम्पत्ति हत्याउन मोरङमा आफ्नै छोराले ९० वर्षीया वृद्धा आमाको हत्या गरेर सुटुक्क जंगलमा जलाएको खुलेको छ । पथरी शनिश्चरे नगरपालिका– २ जयचाेकका ४८ वर्षीय कमल श्रेष्ठले आमाको नाममा रहेको जग्गा हत्याउन आफ्नी ९० वर्षीया आमा जगमाया श्रेष्ठको हत्या गरेर सुटुक्क जंगलमा लगेर जलाएको खुलेको हो । वृद्ध आमाको हत्या आरोपमा प्रहरीले छोरा कमललाई १७ माघमा पक्राउ गरेर कर्तव्य ज्यान कसुरमा अदालतमा म्याद थप गराइसकेको छ ।
मोरङ प्रहरी प्रवक्ता डिएसपी दीपक श्रेष्ठका अनुसार तीन छोरामध्ये कान्छा छोरासँग बस्दै आएकी आमा जगमाया १२ माघदेखि अचानक हराएकी थिइन् । परिवारले सुरुमा कोही आफन्तकोमा गएको ठाने पनि धेरै दिन नआउँदा गाउँभरि हुलिया गरेर खोजी गर्न थालेका थिए । वृद्धा हराएको केही दिनपछि गाउँलेले गाउँसँगै रहेको जंगलको चिहानघारीमा मान्छे जलाएको आलो नलीखुट्टासहितको हाडहरू देखेपछि घरबाट हराएकी वृद्धा जगमाया नै हुनुपर्छ भन्ने शंका गरेर प्रहरीलाई खबर गरेका थिए ।
प्रहरीले हत्यापछि वृद्धालाई जलाएको भन्ने सूचनाको आधारमा सूक्ष्म अनुसन्धान गर्दा उनकै छोराले हत्या गरको पृष्टि भएको थियो । प्रहरीका अनुसार १७ माघमा पक्राउ परेका छोरा कमलले आफ्नै आमाको हत्या गरेको स्वीकार गरिसकेका छन् । पक्राउ परेका श्रेष्ठले प्रहरीलाई बताएअनुसार बुबाको नाममा रहेको १५ कट्ठा नाै धुर जग्गा आमा र दुईजना दाजुहरूलाई थाहा नदिई आफ्नो श्रीमतीको नाममा बनाएका थिए । सोही विषयमा श्रेष्ठ परिवारमा झैझगडा भइरहने गर्दथ्यो ।
सुटुक्क आमाको नाममा रहेको जग्गा भाइले एकलौटी आफ्नो नाममा हडपेको थाहा पाएपछि आमा र दाजुहरूले अदालतमा अंश मुद्दा पनि दर्ता गराएका थिए । अदालतले उक्त जग्गामध्ये पाँच कट्ठा जग्गा आमाको नाममा रहने गरी फैसला गरेको थियो । सोही रिसको आवेगमा कान्छा छोरा कमलले वृद्ध आमाको हत्या गरेर सुटुक्क चिहानघारीमा लगेर जलाएका थिए ।
