पुँजीगत खर्च चार खर्ब ९७ अर्ब मात्रै, प्रदेश र स्थानीय तह झन् कमजोर
गत वर्ष तीनै तहका सरकारको बजेट १८ खर्ब ७८ अर्ब, खर्च साढे १३ खर्ब
संघीय सरकारले पुँजीगत खर्च ६४ दशमलव ६९ प्रतिशत भएको छ, जब कि प्रदेशले ५९.३५ प्रतिशत र स्थानीय तहले ६४.०२ प्रतिशत मात्रै खर्च गरेका छन्
गत आर्थिक वर्षमा केन्द्र, प्रदेश र संघीय सरकारले कुल १८ खर्ब ७८ अर्बको बजेट ल्याएको र त्यसको ७२ प्रतिशत मात्रै खर्च गरेका छन् । सो आवमा संघीय सरकारकै बजेटको आकार १७ खर्ब ७४ अर्ब थियो, प्रदेशको तीन खर्ब र स्थानीय तहको पाँच खर्ब ३३ अर्ब जोड्दा कुल २३ खर्ब आठ अर्बको बजेट देखिन्छ । तर, केन्द्रले प्रदेश र स्थानीय तहमा दिएको र प्रदेशले स्थानीय तहलाई दिएको अनुदान घटाउँदा तीनवटै बजेटको वास्तविक आकार १८ खर्ब ८७ अर्ब देखिएको हो । त्यसमध्ये तीनवटै सरकारले जम्मा १३ खर्ब ६२ अर्ब १८ करोड रुपैयाँ खर्च गरेको महालेखा नियन्त्रकको कार्यालयले प्रकाशित गरेको ‘संघीय तहहरूको एकीकृत वित्तीय विवरण’मा उल्लेख छ ।
राज्यको कुल खर्चको साढे ३६ प्रतिशत रकम मात्रै पुँजी तथा विकास निर्माणमा खर्च भएको देखिएको छ । गएको आर्थिक वर्ष ०७७/७८ मा संघ, प्रदेश र स्थानीय गरी तीनै तहका सरकारले कुल १३ खर्ब ६२ अर्ब १८ करोड रुपैयाँ खर्च गरेका छन् । यसमध्ये ३६.५५ प्रतिशत रकम विकासको काममा खर्च भएको हो । बाँकी रकम भने साधारण र वित्तीय व्यवस्थातर्फ खर्च भएको देखिन्छ ।
तीनवटै सरकारको कुल खर्च १७ खर्ब ७६ अर्ब ९४ करोड रुपैयाँ देखिए पनि त्यसमा संघीय सरकार र प्रदेश सरकारले निकासाकै समयमा खर्च जनाएको रकमलाई हटाएपछिको खुद खर्च १३ खर्ब ६२ अर्ब १८ करोड देखिन आएको हो ।
राज्यले गत वर्ष गरेको खुद १३ खर्ब ६२ अर्बमध्ये जम्मा चार खर्ब ९७ अर्ब १८ करोड रुपैयाँ मात्रै पुँजीगततर्फ खर्च भएको छ । यो कुल खर्चको जम्मा ३६ प्रतिशत मात्रै हो । यो रकम पुँजीगत बजेटतर्फको कुल विनियोजन सात खर्ब ५७ अर्बको भने ६५ दशमलव ६७ प्रतिशत हो । तीनवटै सरकारको कुल बजेटको अनुपातमा मात्रै होइन, पुँजीगत विनियोजनको तुलनामा पनि पुँजीगत खर्च असाध्यै कम गरेका छन् । तीन सरकारको चालूतर्फको एकीकृत खर्च सात खर्ब ४१ अर्ब ७१ करोड छ भने वित्तीय व्यवस्थातर्फ एक खर्ब २३ अर्ब २८ करोड खर्च भएको महालेखा नियन्त्रक कार्यालयले जनाएको छ ।
महालेखाले अन्तरसरकारी वित्तीय हस्तान्तरणका लागि विनियोजित रकमलाई हटाएर (एलिमिनेसनपछिको) यथार्थ आय–व्ययको आर्थिक विवरण तयार पारेर सार्वजनिक गरिसकेको महालेखा नियन्त्रक सुमनराज अर्यालले बताए । सोही प्रतिवेदनले राज्यले गरेको कुल खर्चको एकतिहाइ हाराहारी रकम मात्रै पुँजी तथा विकास निर्माणमा खर्च भएको देखिएको हो ।
संघबाट तल्ला तहमा जाने वित्तीय अनुदानहरू संघका लागि खर्चमा देखिन्छ, तल्ला तहमा चाहिँ सोही रकम आम्दानी देखिन्छ । त्यसलाई हटाएर (एलिमिनेसन) महालेखाले एकीकृत वित्तीय विवरण तयार पारेको हो ।
कुल बजेटको साढे ७२ प्रतिशत मात्रै खर्च
समग्र सरकारले विनियोजित कुल बजेटको साढे ७२ प्रतिशत मात्रै खर्च गर्न सकेको देखिएको छ । गत आवमा समग्र बजेट १८ खर्ब ७८ अर्ब ८३ करोडको ७२.५२ प्रतिशत खर्च भएको देखिएको महालेखाले जाएको छ । त्यस्तै, चालूतर्फ विनियोजित नौ खर्ब ४३ अर्बको ७८.५९ प्रतिशत र वित्तीय व्यवस्थातर्फ विनियोजित एक खर्ब ७७ अर्बको ६९.४६ प्रतिशत खर्च हुन सकेको छ । पुँजीगततर्फ भने विनियोजित समग्र वार्षिक बजेट सात खर्ब ५७ अर्बको ६५.६७ प्रतिशत खर्च हुन सकेको हो ।
पुँजीगत खर्चमा तल्ला तह झन् कमजोर
पुँजी र विकास निर्माणमा खर्च गर्ने मामिलामा तल्ला तह झन् कमजोर देखिएका छन् । विनियोजित वार्षिक पुँजीगत खर्चमा संघीय सरकारभन्दा प्रदेश र स्थानीय तह झन् कमजोर देखिएका हुन् । समग्र सरकारको पुँजीगत खर्च वार्षिक विनियोजनको ६५.६७ प्रतिशत रहेको देखिन्छ । त्यस्तै, संघीय सरकारले पुँजीगततर्फको वार्षिक बजेटको ६४.६९ प्रतिशत खर्च गरेको देखिन्छ । तर, प्रदेशले भने पुँजीगत बजेटको ५९.३५ प्रतिशत मात्रै खर्च गर्न सकेका छन् । त्यस्तै, स्थानीय तहले विनियोजित पुँजीगत बजेटको ६४.०२ प्रतिशत मात्रै खर्च गर्न सकेको महालेखाले उल्लेख गरेको छ ।
कुल आम्दानी २० खर्ब १९ अर्ब
गएको वर्षमा समग्र सरकारको कुल आम्दानी २० खर्ब १९ अर्ब ३६ करोड देखिएको छ । उक्त रकममा वित्तीय हस्तान्तरणलाई समेत प्राप्तिका रूपमा समावेश गरिएको छ । कुल प्राप्तिमा संघको ६२.४६ प्रतिशत, प्रदेशको १३.१२ प्रतिशत र स्थानीय तहको २४.४१ प्रतिशत अंश रहेको महालेखाले उल्लेख गरेको छ । त्यस्तै, आन्तरिक ऋण, बाह्य ऋण र अनुदानको प्राप्ति क्रमशः ११.०३ प्रतिशत, ७.२५ प्रतिशत र १.३३ प्रतिशत रहेको छ ।
तीनै तहका मन्त्रीदेखि कर्मचारीसम्म जवाफदेही नहुँदा अपेक्षित खर्च हुन सकेको छैन
बजेट कार्यान्वयन कमजोर हुने मुख्य तीन–चार कारण देखिएका छन् । संरचना एवं प्रणालीगत समस्या, जवाफदेहिताको अभाव, समन्वयमा समस्या तथा काम गर्ने मानसिकता नै नहुनुलगायत कारणले अपेक्षित रूपमा बजेट खर्च हुन नसकेको हो ।
असारअघि नै बजेट ल्याउँदा पनि खर्च भएन त भन्दा काम गर्ने मानसिकता नै देखिएको छैन । यस्तो समस्या तीनै तहका मन्त्रीदेखि कर्मचारीसम्म नै देखिएको छ । जवाफदेहिता र उत्तरदायित्व कतै देखिएन । असारअघि नै बजेट आएपछि त असार मासन्तसम्म सबै कार्यविधि, निर्देशिका र टेन्डर डकुमेन्ट तयार पारिसक्नुपर्ने हो नि, तर हुँदैन ।
तीनै तहका सरकारबीच तहगत रूपमा तथा सम्बन्धित सरकारका निकायबीच एक–आपसमै समन्वय हुन सकेको छैन । संघमा प्रधानमन्त्रीको कार्यालय, प्रदेशमा मुख्यमन्त्रीको कार्यालय तथा तल्ला तहमा पालिका अध्यक्षको कार्यालयले आयोजनाको निरन्तर फलोअप गर्नुपर्छ, आयोजना प्रमुखलाई खबरदारी गर्नुपर्छ, जुन हुन सकेको देखिँदैन । अन्तरसरकारी वित्त परिषद् र राष्ट्रिय विकास परिषद्को बैठक नियमित हुनुपर्छ ।
अर्को मुख्य कुरा कार्यसम्पादन मूल्यांकन गरेर सोहीअनुसार पुरस्कार र दण्डको व्यवस्था गर्नुपर्छ । बजेट खर्च गर्न नसक्ने प्रदेश वा पालिकाको बजेट अर्को प्रदेश वा पालिकालाई दिनुपर्छ । संघमै पनि बजेट खर्च गर्न नसक्ने मन्त्रालय वा आयोजनाको बजेट सक्नेलाई दिनुपर्छ । तल्ला तहले पनि संघलाई दोष मात्रै देखाउँदै आएका छन् ।