- वि.सं २o७८ भदौ २१ सोमबार
गएरातिदेखिको अविरल वर्षाले पुन्यमाता खोलामा आएको बाढीले बनेपाको पुलबजार क्षेत्र डुबानमा परेको छ । डुबानका कारण अरनिको राजमार्गमा यातायात सञ्चालनसमेत अवरुद्ध भएको छ । पुलबजारका केही घरका पहिलो तला डुबानमा परेका छन् । केही सवारीसाधन पनि डुबानमा फसेका छन् भने पार्किङ गरी राखेका यातायातका साधनहरू पनि डुबानमा परेको प्रहरीले जनाएको छ ।
सोही खोलाको बाढीका कारण बनेपाकै धनेश्वर पुल आसपास पनि डुबानमा परेको छ । उक्त डुबानका कारण बनेपा–पनौती सडक अवरुद्ध भई यातायात ठप्प रहेको छ । पुलबजारमा अवरुद्ध भएपछि सवारीसाधनहरूलाई नाला हुँदै भक्तपुरबाट पठाइएको प्रहरीले जनाएको छ ।
बनेपाको पुलबजार र गोदामचोकाको धनेश्वर पुल आसपास बर्सेनि डुबानमा पर्दै आएको छ । मानवबस्तीले खोला साँघुरो पार्दै आएपछि डुबान हुन थालेको हो । उक्त स्थान बर्सेनि डुबानमा पर्दै आएको भए पनि दीर्घकालीन समस्या समाधानको कुनै प्रयास भएको पाइएको छैन ।
वर्षाका कारण जिल्लाका अन्य खोलामा पनि पानीको सतह बढेको छ । हालसम्म मानवीय क्षतिको जानकारी भने नआएको जिल्ला प्रहरी कार्यालय काभ्रेले जनाएको छ ।
