अफगानिस्तानमा रहेका नेपालीलाई तत्काल स्वदेश फर्काउन युवा संघको माग

एमाले वरिष्ठ नेता माधवकुमार नेपालनिकट युवा संघ नेपालले द्वन्द्वग्रस्त अफगानिस्तानबाट नेपाली नागरिकलाई यथाशीघ्र नेपाल फर्काउन माग गर्दै गृहमन्त्री बालकृष्ण खाणलाई ज्ञापनपत्र बुझाएको छ । संघका महासचिव दीपक जिएमको नेतृत्वमा सिंहदरबार गएको टोलीले नेपाली नागरिकलाई सुरक्षित रूपले स्वदेश फर्काउन माग गरेको हो । 

द्वन्द्वग्रस्त क्षेत्रबाट विश्वका विभिन्न मुलुकले आफ्ना नागरिकलाई सुरक्षित रूपले स्वदेश फर्काउन थाले पनि नेपालले आफ्ना नागरिकलाई फर्काउन ढिलाइ गरेकोमा संघले आपत्ति जनाएको छ । 

‘श्रमिकका रूपमा रहेका सम्पूर्ण नेपालीको सुरक्षालाई उच्च प्राथमिकतामा राखेर यथाशीघ्र नेपाल फर्काउन तत्काल आवश्यक कूटनीतिक, राजनीतिक र मानवीय पहल गर्न नेपाल सरकारलाई युवा संघ नेपाल जोडदार माग गर्दछ,’ संघले गृहमन्त्रीलाई बुझाएको ज्ञापनपत्रमा उल्लेख गरिएको छ ।

नेपालबाट श्रम स्वीकृति लिई अफगानिस्तान पुगेका र सरकारको अभिलेखमा नरहेका नागरिकलाई स्वदेश ल्याउन ध्यानाकर्षण गराएको संघका उपमहासचिव एवं प्रवक्ता सञ्जिप राईले बताए ।