शेखर कोइरालाको सुझाब– १४औँ महाधिवेशन १५ भदौमा सुरु गरेर निर्वाचन आयोगमा जानकारी दिऔँ

कांग्रेसका नेता डा. शेखर कोइरालाले पार्टीको १४औँ महाधिवेशन भदौ १५ मा सुरु गरेर निर्वाचन आयोगलाई जानकारी गराउनुपर्ने बताएका छन् । कांग्रेस सिन्धुपाल्चोकले राजधानीमा आयोजना गरेको १४औँ महाधिवेशनको सुनिश्चितता र भावी नेतृत्व विषयक अन्तर्क्रियामा कोइरालाले यस्तो बताएका हुन् । 

‘भदौको १५ बाट अधिवेशन सुरु गरौँ र सबै तहको गर्दै जाऔँ,’ उनले भने, ‘कांग्रेस अत्यन्तै संकटमा छ । अदालतमा राजनीतिक मुद्दा सबैको छ, तर कांग्रेसको छैन । महाधिवेशन हुन नसके कांग्रेसको पनि पर्न सक्छ, कसैले मुद्दा हालेर अदालतले फरक निर्णय गरिदियो भने के हुन्छ ? त्यसैले भदौ १६ अघि अधिवेशनको प्रक्रिया सुरु गरेर निर्वाचन आयोगलाई जानकारी दिनुपर्छ ।’

उनले क्रियाशील सदस्यताको समस्या धेरै जिल्लामा रहेको बताए । सभापति शेरबहादुर देउवाले भदौ १६ मा महाधिवेशन उद्घाटन गर्छु भनेर कांग्रेस कार्यर्तालाई भुलभुलैयामा राखेको उनले बताए । ‘अधिवेशन हुन नसकेकोमा म क्षमा चाहन्छु । कांग्रेस लोकतन्त्रको पाठशाला हो । अरू दलहरूलाई हामीले सिकाउनुपर्ने हो । तर, हामी नै लोकतान्त्रिक बन्न सकेनौँ ’ उनले भने । 

उनले पदाधिकारीहरूले निचोड निकाल्न नसकेको पनि बताए । दुई वर्षपछि अधिवेशन गरेर विधानविपरीत पद थप्ने कुरा आएको भन्दै आफूलाई त्यस्तो प्रस्ताव मान्य नहुने कोइरालाले बताए । ‘दुई वर्षपछि अधिवेशन गरौँ भन्ने प्रस्ताव पनि आएको छ । पदाधिकारीमा उपसभापतिलगायत थप्ने भन्ने कुरा आएको छ ।  यस्तो कुराले कांग्रेस कमजोर बन्छ,’ उनले भने, ‘मलाई विधाविपरीत कुनै पद दिए स्वीकार गर्दिनँ । भदौभित्र  वडा अधिवेशन सुरु गरेर मंसिरको पहिलो हप्ता सक्ने कुरा आएको छ । यस्तै गाउँपालिका, नगरपालिका र जिल्ला अधिवेशन स्थगन गरेर अघि बढ्ने कुरा आइरहेको छ । यस्तो कुराले नेतृत्व विकास हुँदैन ।’