भारी वर्षापछिको बाढीले चीनमा २५ जनाको मृत्यु

चीनमा भारी वर्षापछि आएको बाढीमा परी कम्तीमा २५ जनाको मृत्यु भएको छ। आइतबारदेखि परेको वर्षाका कारण यहाँको हेनन प्रान्तमा कम्तीमा २५ जनाको मृत्यु भएको र सातजना अझै हराइरहेका ग्लोबल टाइम्सले जनाएको छ।

बाढीका कारण यस प्रान्तमा १२ लाखभन्दा धेरै मानिस प्रभावित भएका छन्। एक लाख ६० हजारभन्दा बढीलाई सुरक्षित स्थानमा सारिएको र उद्धारकार्य जारी रहेको समाचारमा जनाइएको छ। जेङ्जौ सहरमा मात्र ३६ हजारभन्दा बढी मानिस अति प्रभावित भएका छन्।

मुसलधारे वर्षापछि आएको बाढी–पहिरोले घर तथा सडकहरूमा क्षति पुगेकोे छ। यातायात र सञ्चारमा अवरोध आएको छ भने अधिकांश व्यवसाय बन्द भएका छन्। दैनिक ६ सयभन्दा धेरै रेल आवतजावत गर्ने जेङ्जौ इस्ट रेल्वे स्टेसन तथा रेलमार्ग जलमग्न भएका छन्।

मंगलबारदेखि बुधबार बिहानसम्म हेनन प्रान्तमा दुई सय ५० देखि तीन सय ५० मिलिमिटर र जेङ्जौ प्रान्तमा पाँच सयदेखि ६ सय ५७ मिलिमिटर वर्षा मापन गरिएको समाचारमा उल्लेख छ।