- वि.सं २o७८ जेठ २ आइतबार
प्रधानमन्त्री केपी ओलीले आगामी आर्थिक वर्षको बजेट संसद्बाटै ल्याउने संकेत गरेका छन् । प्रधानमन्त्री तथा मन्त्रिपरिषद्को कार्यालयमा एमाले वरिष्ठ नेता माधवकुमार नेपालसँगको वार्तापछि पत्रकारले राखेको जिज्ञासामा ओलीले संसद् जीवित रहेको भन्दै आगामी आर्थिक वर्षको बजेट संसद्बाटै आउने संकेत गरेका हुन् ।
बजेट अध्यादेशबाट आउँछ भन्ने शंका छ नि भन्ने जिज्ञासामा ओलीले भने, ‘पार्लियामेन्ट जीवित छ ।’
प्रधानमन्त्री ओली संविधानको धारा ७६(३) अनुसार संसद्को सबैभन्दा ठूलो दलको नेताको हैसियतमा प्रधानमन्त्री नियुक्त भएका छन् । ओलीले ३० दिनभित्र संसद्बाट विश्वासको मत लिनुपर्ने संवैधानिक व्यवस्था छ ।
आफ्नै पार्टीभित्रको विवादसँगै संसद्को बजेट अधिवेशन आह्वान गर्न ढिलाइ हुनुले सरकारले फेरि संसद् विघटन गरी अध्यादेशबाट बजेट ल्याउने हो कि भन्ने आशंका राजनीतिक वृत्तमा गर्न थालिएको छ ।
