- वि.सं २o७८ बैशाख २८ मंगलबार
नेपाल नागरिक उड्डयन प्राधिकरणले हेलिकोप्टर कम्पनीहरूलाई महामारीमा जनतासँग बढी भाडा असुल नगर्न निर्देशन दिएको छ । प्राधिकरणले सरकारले तोकेको भाडाभन्दा बढी असुल गरेको पाइए कारबाही गर्ने चेतावनीसमेत दिएको छ ।
प्राधिकरणले गुनासो गर्नका लागि छट्टै युनिटसमेत गठन गरेको छ । भाडा बढी लिइएको भन्ने गुनासो आउनेबित्तिकै सबै हेलिकोप्टर कम्पनीलाई परिपत्र गरेर बढी भाडा असुल नगर्न निर्देशनसमेत दिइएको नेपाल नागरिक उड्डयन प्राधिकरणका महानिर्देशक राजन पोखरेलले जानकारी दिए ।
नयाँ पत्रिका दैनिकले हेलिकोप्टर कम्पनीहरूले बढी भाडा असुल गरेको समाचार प्रकाशन गरेको थियो । नियमक निकाय प्राधिकरणले कारबाही गर्न नसकेको आरोप लागिरहेका वेला प्राधिकरणले निर्देशन दिएको हो ।
‘सरकारले ०७२ चैत ७ को मन्त्रीस्तरीय निर्णयअनुसार तोकेको भाडाभन्दा बढी असुल नगर्न भनेका छौँ,’ महानिर्देशक पोखरेलले भने । सरकारले ०७२ सालमा ए३५० सिरिज तथा बेल २०६ हेलिकोप्टरका लागि प्रतिघन्टा उडानको बढीमा १ हजार ५ सय डलर लिने पाउने गरी भाडा तोकेको थियो । नेपालमा अधिकांश हेलिकोप्टर कम्पनीसँग सोही सिरिजका हेलिकोप्टर रहेका छन् । त्यस्तै, आर४४ हेलिकोप्टरका लागि प्रतिघन्टा उडानका लागि १ हजार डलर तोकिएको थियो । एमआई १७ का लागि भने प्रतिघन्टा ६ हजार डलर तोकिएको थियो ।
अहिले कम्पनीहरूले कोभिडका बिरामी चार्टरमा डक्टर तथा अन्य शुल्क लिएका कारण पनि बढी रकम पुगेको भन्दै प्राधिकरणलाई स्पष्टीकरण दिएका थिए । ‘हामीले अहिले सहुलियत दरमै उडान गर्न निर्देशन दिएका छौँ, कम्पनीहरूले सरकारले तोकेको भन्दा पनि कम १ हजार २ सय डलर प्रतिघन्टा उडान गर्ने प्रतिबद्धता जनाएका छन्,’ पोखरेलले भने ।
वायुसेवा सञ्चालक संघ (आयोन) ले पनि स्वास्थ्य मापदण्डका कारण केही रकम थप भएको स्वीकार गर्दै महामारीमा सहुलियतमा उडान गर्न सार्वजनिक अपिल गरेको छ । संघले विज्ञप्तिमार्फत तोकिएको भन्दा धेरै रकम नलिन आग्रह गर्दै गुनासो गर्नका लागि सम्पर्क नम्बरसमेत सार्वजनिक गरेको छ ।
