नयाँ पत्रिका फलोअप : हेलिकोप्टरको भाडाले थलिन्छन् बिरामीका आफन्त

पीडित भन्छन्– हेलिकोप्टरमा लैजाँदा लागेको ऋण कसरी तिर्ने भन्ने पिरले निद्रा लाग्दैन

डोल्पाका संक्रमितको उपचारमा २२ लाख खर्च 
कोरोनाको पहिलो लहरका वेला गत पुसमा डोल्पा ठूलीभेरी नगरपालिका– २ का वडाध्यक्ष ६० वर्षीया देवी रोकाय र दुनैको सरस्वती माध्यमिक विद्यालयका शिक्षक ५४ वर्षीय शिवप्रसाद पोख्रेल संक्रमणले सिकिस्त भए । दुवैलाई जिल्ला अस्पतालमा भर्ना गरियो । तर, स्वास्थ्य अवस्था थप बिग्रँदै गएपछि दुवैका परिवारले थप उपचारका लागि काठमाडौं लैजाने चाँजोपाँजो मिलाए । 

डोल्पा सदरमुकामसम्म कच्ची सडक खुले पनि पुल नबनेका कारण धेरै ठाउँमा गाडी परिवर्तन गर्नुपर्ने भएकाले सडकमार्गबाट बिरामी लैजान सम्भव थिएन, जहाज पनि बन्द थिए । त्यसैले जिल्ला प्रशासनसँग समन्वय गरेर काठमाडौंबाट कैलाश एयरसँग कुरा भयो । प्रतिहेलिकोप्टर ६ लाख ६० हजार रुपैयाँ अग्रिम भाडा तिरेपछि मात्रै हेलिकोप्टर आउने बताएपछि दुवै बिरामीको परिवारले आफन्त, इष्टमित्रसँग ऋण काढेर कैलाशको खातामा पैसा जम्मा गरेपछि मात्रै दुई हेलिकोप्टर १७ पुसमा डोल्पा आइपुगे । उनीहरूलाई ह्याम्स अस्पताल भर्ना गरियो । 

‘मलाई केही थाहा थिएन, हेलिकोप्टर झिकाउने चाँजोपाँजो सबै छोराले मिलाएछ, ऋण सापट गरेर उपचार गरे, निको पनि भएँ । उपचारमा २२ लाख खर्च भएछ,’ अध्यक्ष रोकायले नयाँ पत्रिकासँग भने, ‘तर, अहिले ब्याजमा लिएको ऋण कसरी तिर्ने भन्ने ठूलो तनावमा छु । रातभरि निद्रा लाग्दैन, ऋणको पिरले पिरोलिरहन्छ ।’ यातायातको भरपर्दो सुविधा नहुनुका साथै जिल्लामै भरपर्दो स्वास्थ्य सुविधा नहुँदा दुर्गमका नागरिकले दुःख पाइरहेको रोकायले बताए ।

दुनैका शिक्षक पोख्रेलको भने महामारीले ज्यान नै लग्यो । उनको घर स्याङ्जाको आँधीखोला गाउँपालिका हो । ६ लाख ६० हजार हेलिकोप्टरको भाडा तिरे पनि ह्याम्स अस्पताल पु¥याएको एक दिनमै उनको मृत्यु भएको थियो । न परिवारको पैसा जोगियो, न ज्यान नै । आर्थिक रूपमा विपन्न पोख्रेलको परिवारलाई उनले पढाउने विद्यालयले हेलिकोप्टर भाडामा दुई लाख सहयोग गरेको प्राचार्य सत्यनारायण सिंहले बताए । 

कोरोनाको दोस्रो लहरमा पनि डोल्पामा संक्रमितको संख्या बढ्दै छ । तर, जिल्लामा न यातायातको सुविधा छ, न सुविधासम्पन्न अस्पताल छ । त्यसैले जीवनको आशा गर्नेले लाखौँ रुपैयाँ तिरेर हेलिकोप्टरमै काठमाडौं पुग्नुपर्ने बाध्यता छ । जिल्ला अस्पतालमा दुईवटा मात्रै अक्सिजनसहितका आइसोलेसन बेड छन् । भएका दुई भेन्टिलेटर जनशक्ति अभावसँगै विद्युत्को भोल्टेज अभावका कारण बन्द छन् । संक्रमितको अवस्था जटिल भइहालेको अवस्थामा लाखौँ खर्च गरेर हेलिकोप्टर चार्टर्ड गरेर जिल्लाबाहिर लैजानुको विकल्प छैन । डोल्पामा अहिलेसम्म ३३ जनामा संक्रमण देखिएको जिल्ला स्वास्थ्य सेवा कार्यालयले जनाएको छ । तीनजना निको भइसकेका छन् । 

संक्रमित थाहा भएपछि थप ५० हजार असुलियो
बाराको कलैया नगरपालिकाका अधिकृत राजीव यादव १८ वैशाखमा कार्यालय सकेर घर फर्केपछि अस्वस्थ भए । राति ९ बजे उनलाई कलैयामा रहेको सामुदायिक अस्पताल पुर्‍याइयो । त्यहाँ उनको ज्वरो जाँच्ने र सामान्य औषधि दिएर घर फर्काइयो । घर आएर औषधि खाएर सुते । बिहान ३ बजे अचानक श्वासप्रश्वासको समस्या बढेपछि उनका साथी विकास सिंहले एम्बुलेन्समा कलैया अस्पताल पु¥याए । त्यहाँबाट वीरगन्जस्थित तराई हस्पिटल रेफर गरियो । त्यहाँ कोरोना पुष्टि भयो । 

श्वासप्रश्वासमा सुधार नभएपछि डाक्टरले काठमाडौं लैजान सुझाए । परिवारका सदस्यले एक लाख ८५ हजार भाडा तोकेर काठमाडौंबाट हेलिकोप्टर झिकाए । तर, कोरोना संक्रमित भएको थाहा पाएपछि हेलिकोप्टर कम्पनीले थप ५० हजार लिने अडान लियो । दुई लाख ३५ हजार भाडा तिर्ने सहमति भएपछि मात्रै राजीवलाई काठमाडौंस्थित मेडिसिटी अस्पताल लगियो । 

कोरोना रिपोर्ट पजिटिभ आएकै कारण थप ५० हजार तिर्नुपरेको राजीवका साथी विकासले बताए । ‘उहाँको आर्थिक हैसियत राम्रै भएकाले हेलिकोप्टरमा लगेर उपचार गर्न सकियो, गरिब भइदिएको भए मर्नुको विकल्प थिएन,’ उनले भने । 

पाल्पाबाट काठमाडौं लगेको फरक–फरक भाडा
गत ११ वैशाखमा होम आइसोलेसनमा बसेका तानसेनका नारायणबहादुर कार्कीलाई श्वासप्रश्वासमा समस्या देखिएपछि परिवारले अल्टिच्युड एयरको हेलिकोप्टरबाट काठमाडौं लग्यो । काठमाडौं पुर्‍याउन चार लाख ६० हजार भाडा लाग्यो । यसका अतिरिक्त दुई स्वास्थ्यकर्मीको भन्दै हेलिकोप्टर थप ६० हजार उठायो । 

ठीक भएपछि कार्कीले भने, ‘आर्थिक अवस्था कमजोर भएकाका लागि हेलिकोप्टरको सेवा निकै महँगो पर्ने रहेछ । ज्यान जोगाउनकै लागि ऋणधन जे गरेर भए पनि हेलिकोप्टर चढ्नै पर्ने अवस्था आयो ।’

गत फागुनमा पाल्पाका यादवबहादुर रायमाझीलाई परिवारले उपचारका लागि सिम्रिक एयरको हेलिकोप्टरमार्फत तानसेनबाट काठमाडौं लग्यो । हेलिकोप्टरको भाडा तीन लाख ३५ हजार र स्वास्थ्यकर्मीका लागि थप ६५ हजार तिरेका परिवारले बताएको छ । तर, यही रुटमा ११ वैशाखमा अल्टिच्युड एयरले चार लाख ६० हजार भाडा लिएको थियो । गत १४ वैशाखमा तानसेन बर्तुङका दयाराम पाण्डे र उनका छोरा संक्रमित भए । उनलाई उपचारका लािग लुम्बिनी मेडिकल कलेजमा लगियो । तर, अस्पतालले भर्ना गर्न नसक्ने भनेपछि सिम्रिक एयरको हेलिकोप्टर मगाएर काठमाडौं लगियो । उनीहरूले कति भाडा तिरे भन्ने खुल्न सकेन । 

रुपन्देहीबाट १० बिरामीको उद्धार

कोभिड बिरामीको संख्या बढेसँगै रुपन्देहीबाट राजधानीमा उपचारका लागि लैजाने संक्रमितको संख्या पनि बढ्न थालेको छ । रुपन्देहीबाट कम्तीमा १० जना बिरामीलाई थप उपचारका लागि राजधानी पठाएको दीप ट्राभल्सका सञ्चालक दीपेश गुप्ताले बताए ।

कोभिड बिरामीलाई काठमाडौं पठाएको तीन लाख ६० हजार हेलिकोप्टर कम्पनीले भाडा लिने गरेका छन् । हेलिकोप्टरमा आउने चिकित्सकको टोलीले थप ५० हजार लिने गरेको उनको भनाइ छ । रूपन्देहीबाट काठमाडौं बिरामी पठाउन चार लाख १० हजार लाग्ने उनले जानकारी दिए । अन्य बिरामीलाई काठमाडौं पठाउन भने हेलिकोप्टर भाडा दुई लाख २० हजार र चिकित्सक टोलीका लागि २० देखि २५ हजार लिने गरेको उनको भनाइ छ । कोभिड बिरामी बोकेको हेलिकोप्टरले बिरामी अस्पताल पुर्‍याएपछि निसंक्रमित गर्नुपर्ने भएकाले अरू बिरामीभन्दा बढी शुल्क लिने गरेको उनको दाबी छ । अहिले रूपन्देहीबाट सिम्रिक र मनाङ एयरका हेलिकोप्टरले उद्धार गर्दै आएका छन् ।

भाडा भुक्तानीपछि मात्र उडान
बिरामी उपचारका लागि राजधानी पठाउने सबै आर्थिक हैसियत राम्रो भएका मात्र छैनन् । कतिपय विपन्नले ऋण खोजेरै पनि हेलिकोप्टरबाट बिरामी लैजाने गरेका छन् । तर, सबै कम्पनीले अग्रिम भुक्तानीपछि मात्र उडान भर्ने गरेको उनले बताए । ‘बीचमा बिरामीलाई केही भइहाले रकम कसले भुक्तानी गर्ने भन्ने विवाद आउन सक्ने भएकाले रकम भुक्तानीपछि मात्र उडान भर्ने गरेका हौँ,’ उनले भने ।