- वि.सं २o७८ बैशाख २२ बुधबार
नेपाली राष्ट्रिय टी–२० पुरुष टोलीका ओपनिङ ब्याट्सम्यान कुशल भुर्तेल अन्तर्राष्ट्रिय क्रिकेट काउन्सिल (आइसिसी)को प्ले अफ दी मन्थ अवार्डमा मनोनीत भएका छन् । पाकिस्तानका दुई ब्याट्सम्यान बाबर आजम र फखर जमानसँगै कुशल पनि अप्रिल महिनाको प्लेयर अफ दी मन्थ अवार्डमा मनोनीत भएका हुन् ।
आइसिसीले तीन खेलाडीको नाम बुधबार आफ्नो वेबसाइटमा भोटिङका लागि सार्वजनिक गरेको छ । कुशलले यसै महिना त्रिवि क्रिकेट मैदानमा नेदरल्यान्ड्स, नेपाल र मलेसिया सम्मेलित त्रिकोणात्मक टी–२० सिरिजमा डेब्युको अवसर पाएका थिए । सो त्रिकोणात्मक सिरिज ४ देखि ११ वैशाखसम्म भएको थियो । डेब्यु खेलमा उनले सनसनी मात्र मच्चाएनन्, विश्व कीर्तिमानी प्रदर्शनसमेत गरे । प्रतियोगिताको म्यान अफ दी सिरिज घोषित कुशलले पाँच खेलमा चार अर्धसतकसहित सर्वाधिक दुई सय ७८ रनको योगदान दिएका थिए ।
कुशलकै उत्कृष्ट प्रदर्शनकै मद्दतमा नेपालले सन् २०१० पछि घरेलु मैदानमा क्रिकेट उपाधि जितेको थियो । ११ वर्षअघि कप्तान विनोद दासको नेतृत्वमा नेपालले आइसिसी डिभिजन ५ को उपाधि हात पारेको थियो । नेपालले घरेलु मैदानमा टी–२० सिरिजमाथि कब्जा जमाएको यो पहिलोपटक हो । नेपालका लागि मुख्य प्रशिक्षक बनेका श्रीलंकाली डेभिड वाटमोरले नेदरल्यान्ड्सविरुद्धको पहिलो खेलमै कुशल र आसिफ सेखलाई ओपनिङ जोडीका रूपमा उतारेका थिए ।
टी–२० डेब्युमै विश्व कीर्तिमान
सिरिजको पहिलो खेल नेदरल्यान्ड्सविरुद्ध (१७ अप्रिल) कुशल र आसिफले पहिलो विकेटका लागि एक सय १६ रनको साझेदारी गरे । यस खेलमा नेपाल नौ विकेटले विजयी भयो । कुशलले केवल ४६ बलमा समान पाँच छक्का र चौका प्रहार गरी ६२ रन जोडे । कुशलले ३० बलमा आफ्नो डेब्यू टी–२० अन्तर्राष्ट्रिय खेलमै अर्धसतकीय इनिङ्स खेल्दै सनसनी मचाउन सफल भए । नेदरल्यान्ड्सविरुद्ध जमेको ओपनिङ जोडीले मलेसियाविरुद्धको खेलमा पनि निरन्तरता पायो ।
१९ अप्रिलमा मलेसियाले १६.५ ओभरमा सवै विकेट गुमाएर एक सय ९ रन बनाएको थियो । प्रत्युत्तरमा कुशल र आसिफले पहिलो विकेटका लागि पुनः एकपटक उत्कृष्ट ब्याटिङ गरी एक सय दुई रनको साझेदारी गरे । यस खेलमा कुशल मलेसियाविरुद्ध नै ४१ बलमा पाँच छक्का र तीन चौका प्रहार गरी ६१ रन बनाए । यो खेलमा कुशलले २६ बलमै अर्धशतक बनाए ।
२० अप्रिलमा नेपालले नेदरल्यान्ड्सविरुद्ध खेल्दा कुशलले ४६ बलमा एक छक्का र आठ चौका प्रहार गरी ६२ रनको योगदान दिए । यो खेलमा नेपाल नेदरल्यान्ड्ससँग तीन विकेटले पराजित भएको थियो । डेब्यु सिरिजमै तीन अर्धशतक प्रहार गर्दै विश्वकीर्तिमान बनाएका कुशल राष्ट्रिय तथा अन्तर्राष्ट्रिय मिडियामा एकैपटक छाए । २२ अप्रिलमा मलेसियाविरुद्धको खेलमा कुशलले केवल १६ रन मात्र बनाएका थिए ।
२४ अप्रिलको फाइनल खेलमा कुशल पुनः एकपटक चम्कदा नेदरल्यान्ड्सको केही सीप लागेन । उपाधि भिडन्तमा कुशलले ५३ बलमा तीन छक्का र आठ चौकाको सहयोगमा ७७ रनको अर्को म्याच विनिङ इनिङ्स खेले । फाइनलमा उनले ४३ बलमै अर्धशतक जमाए । डेब्यु टी–२० अन्तर्राष्ट्रिय सिरिजमा चार अर्धशतक प्रहार गर्ने कुशल एक मात्र खेलाडी बनेका छन् । यस खेलमै नेपालले टी–२० खेलमा उच्चतम योगफल २३८÷३ बनाएको थियो । डेब्यु सिरिजमै स्मरणीय बनाएका कुशलले १ सय ९८ बलको सामना गरी १४०.४० को स्ट्राइक रेट राखे । उनले सिरिजभरि नै २४ चौका र १६ छक्का प्रहार गरेका थिए ।
यसै त्रिकोणात्मक सिरिजकै प्रदर्शनकै आधारमा कुशल पहिलोपटक आइसिसीको टी–२० को ब्याटिङ वरीयतामा समावेश भए । पहिलोपटक समावेश हुँदा उनी ९३औँ स्थानमा रहे । पछिल्लो अपडेटअनुसार कुशल आइसिसी टी–२० को ब्याटिङ वरीयतामा ६१औँ स्थानामा उक्लेका छन् ।
कुशलका प्रत्यासी यस्ता छन्
२४ वर्षीय कुशलका पाकिस्तानी दुई प्रतिद्वन्द्वी बाबर र फखरले दक्षिण अफ्रिकाविरुद्ध एकदिवसीय सिरिजमा उत्कृष्ट प्रदर्शन गरेका थिए । एकदिवसीय सिरिजमा बाबरले दुई सय २८ रन बनाएका थिए । यस प्रदर्शनको आधारमा बाबरले आइसिसी एकदिवसीय ब्याटिङ वरीयतामा भारतका विराट कोहलीलाई पछि पार्दै शीर्ष स्थानमाथि कब्जा जमाएका छन् । फखरले दक्षिण अफ्रिकाविरुद्ध एकदिवसीय सिरिजमा तीन सय दुई रन बनाएका थिए ।
पाकिस्तानका कप्तान बाबरले दक्षिण अफ्रिकासँग एकदिवसीय र टी–२० सिरिज जिताउन उत्कृष्ट प्रदर्शन गरेका थिए । दक्षिण अफ्रिकासँग पहिलो एक दिवसीय खेलमा पाकिस्तानले तीन विकेटको जित निकाल्दा बाबरले १ सय ३ रनको शतकीय इनिङ्स खेलेका थिए । तेस्रो तथा निर्णायक एक दिवसीयमा उनले ९४ रनको महत्वपूर्ण इनिङ्स खेलेका थिए ।
टि–२० खेलमा दक्षिण अफ्रिकाले प्रस्तुत गरेको २ सय ४ रनको लक्ष्य पछ्याउँदा बाबरले १ सय २२ रनको कीर्तिमानी इनिङ्स खेलेका थिए । अर्का ओपनर फखर दक्षिण अफ्रिकासँग दोस्रो र तेस्रो एकदिवसीय खेलमा शतक प्रहार गरेका थिए । उनले दोस्रोमा १ सय ९३ रन र तेस्रोमा १ सय १ रनको उत्कृष्ट शतकीय इनिङ्स खेल्दै पाकिस्तानलाई सिरिज जिताएका थिए ।
अवार्डको विजेता आइसिसीकै प्यानल र खुला मतदानको मतअनुसार घोषणा हुनेछ । आइसिसीको प्यानलमा पूर्वखेलाडी, पत्रकार तथा ब्रोडकास्टरको उपस्थिति रहनेछ । आइसिसी प्यानलको मतभार ९० प्रतिशत र खुला मतदानको १० प्रतिशत भार हुनेछ । दुवै जोडेर सर्वाधिक मत प्राप्त गर्ने खेलाडीले अवार्ड जित्नेछ ।
कुशलको यात्रा
कुशलले सन् २०१२ मै यू–१६ राष्ट्रिय टोलीमा स्थान बनाएका थिए । मलेसियामा भएको यू–१६ इलिट कपमा कतारविरुद्ध उनले डेब्यु गर्दै ३५ रनको योगदान दिए । तर बहराइनसँगको प्रतिस्पर्धा अघि अभ्यासको क्रममा उनको दायाँ हात भाँचियो । त्यसपछि उनी नेपाल फर्र्किए ।
सन् २०१५ को यू–१९ टोलीमा पनि उनले स्थान बनाए । त्यही वर्ष मलेसियामा भएको यू–१९ विश्वकपमा उनले नेपालबाट प्रतिस्पर्धा गरे । यद्यपि विश्वकपमा एक खेल नखेलेका कुशलले हार मानेनन् । घरेलु प्रतियोगितामा आफूलाई उनले व्यस्त बनाए । विभागीय टोली नेपाल पुलिससँग आबद्ध भए । पुलिससँग आबद्ध भएयता उनले कहिले पछाडि फर्केर हेर्नुपरेन । सन् २०१६ मा बंगलादेशमा भएको यू–१९ विश्वकपमा स्थान बनाएका कुशलले सौरभ खनाल घाइते भएपछि टोलीमा स्थान सुरक्षित गरे । घरेलु क्रिकेट प्रतियोगितामा कुशलले ललितपुरबाट एभरेस्ट प्रिमियर लिग, पोखराबाट पोखरा प्रिमियर तथा विराटनगरबाट धनगढी प्रिमियर लिग खेलेका छन् । सन् २०१९ मा कुशलले लिस्ट एमा नेपाली राष्ट्रिय टोलीमा स्थान पक्का गरे ।
