मुख्य समाचारफ्रन्ट पेजसमाचारदृष्टिकोणअर्थअन्तर्वार्तामल्टिमिडियाखेलकुदविश्वप्रवासकोरोना अपडेटकर्नर किकसम्पादकीयस्वास्थ्य र जीवनशैली१३औँ वार्षिकोत्सव विशेषांकफिचरलाेकसेवाप्रेरक प्रसंग१२औँ वार्षिकोत्सव विशेषांकसप्तरंगटर्निङ प्वाइन्ट्स-२०२०टर्निङ प्वाइन्ट्स-२०१९प्रदेशब्लगEnglishटर्निङ प्वाइन्ट्स-२०२१
  • वि.सं २०७७ फाल्गुण २१ शुक्रबार
  • Friday, 05 March, 2021
२०७७ पौष २९ बुधबार ०७:३६:००
Read Time : > 1 मिनेट
मुख्य समाचार प्रिन्ट संस्करण

परीक्षाहलबाट निकालिएका दलित विद्यार्थीले अब परीक्षा दिन पाउने

Read Time : > 1 मिनेट
२०७७ पौष २९ बुधबार ०७:३६:००

गैरकानुनी शुल्क तिर्न नमानेपछि एमबिबिएसको परीक्षाहलबाट निकालिएका दुई दलित विद्यार्थीले अब हुने परीक्षा दिन पाउने भएका छन् । चिकित्सा शिक्षा आयोग र इन्स्टिच्युट अफ मेडिसिन (आइओएम) को पहलमा उनीहरूलाई परीक्षामा सहभागी गराइने भएको छ । 

उनीहरूलाई सोमबार परीक्षाहलबाट निकालिएपछि नयाँ पत्रिकालगायत सञ्चारमाध्यममा समाचार प्रकाशित भएको थियो । त्यसपछि आइओएमले कडा निर्देशन दिएको हो । अब वीरगन्जस्थित नेसनल मेडिकल कलेजले रामजी राम र पंकज रामलाई परीक्षामा सामेल गराउने भएको छ ।

परीक्षाबाट निकालिएका रामजी रामका अनुसार कलेजले फाराम भर्न बोलाएको र बाँकी रहेको परीक्षामा सहभागी हुन भनेको छ । तीन विषयको परीक्षामध्ये एउटा परीक्षा छुटेको रामले बताए । योसँगै रामजी र पंकजले बुधबारको परीक्षा दिन पाउने भएका हुन् ।

सोमबारदेखि सुरु भएको एमबिबिएस परीक्षा दिन गएका उनीहरूलाई कलेजले शुल्क नतिरेको भन्दै परीक्षाहलमा छिरेको एक मिनेटमै बाहिर निकालेको थियो । चिकित्सा शिक्षा आयोगले आइतबार नै आइओएम र कलेजलाई दुवैजना विद्यार्थीलाई परीक्षामा सहभागी गराउन पत्राचार गरेको थियो । कलेजले अटेर गरी परीक्षामा सामेल नगराएपछि आइओएमले मंगलबार कडा निर्देशन दिएको हो । 

सोमबारको परीक्षा भने दुवैजनाको छुटेको छ । यसबारे आइओएमलाई जानकारी गराइएको र उताबाट के गर्ने भन्ने अहिले जानकारी नआएको उनले बताए । दलित छात्रवृत्ति पाएका विद्यार्थीलाई विश्वविद्यालय अनुदान आयोगले बस्न र खानबाहेकका शीर्षकमा रकम नलिन कलेजहरूलाई निर्देशन दिएको छ । तर, कलेजले भने ल्याब, पुस्तकालय, भर्ना शुल्क र अन्य भनेर थप साढे सात लाखको बिल थमाएको छ । 

कलेजले सरकारले तोकेभन्दा बढी शुल्क मागेको भन्दै यहाँका विद्यार्थीले अनुदान आयोग र शिक्षा मन्त्रालयमा उजुरी दिएका थिए । २७ असोज ०७४ मा आयोगले यसबारे बुझ्न सदस्य राधाकृष्ण घिमिरेको संयोजकत्वमा विनोद भट्टराई र कृष्णहरि प्रजापति सदस्य रहेको छानबिन समिति बनाएर स्थलगत अनुगमनमा पनि पठाएको थियो । 

रामजी र पंकज अहिले एमबिबिएस पाँचौँ वर्षमा अध्ययनरत छन् । सरकारले ०७२ मा बादी, डोम, मुसहर र चमारलाई पढाउने कार्यक्रम ल्याएको थियो । त्यहीअन्तर्गत दुवैजना नेसनल मेडिकल कलेजमा भर्ना भएका हुन् । उनीहरूको सम्पूर्ण खर्च विश्वविद्यालय अनुदान आयोगले तिरिदिने व्यवस्था छ । जसमा छात्रवास र खानाको खर्च आफैँले तिर्नुपर्छ । 

याे पनि पढ्नुहाेस् : दुई दलित विद्यार्थी एमबिबिएसको परीक्षाहलबाट निकालिए