- वि.सं २o७७ पौष २८ मंगलबार
अमेरिकी राष्ट्रपति डोनाल्ड ट्रम्पले क्युवालाई ‘आतंकवादलाई सहयोग गर्ने देश’को सूचीमा पुनः समावेश गरेका छन् । यसअघि पूर्वराष्ट्रपति बाराक ओबामाले यो सूचीबाट क्युवालाई हटाएका थिए । ट्रम्पको यो निर्णय नवनिर्वाचित राष्ट्रपति जो बाइडेनले सत्ता सम्हाल्ने केही दिनअघि मात्रै आएको हो । बाइडेनले २० जनवरीमा राष्ट्रपतिको शपथग्रहण गर्दै छन् ।
अमेरिकाका विदेशमन्त्री माइक पोम्पिओले अमेरिकी सरकारले सधैँ क्यास्ट्रो सरकारप्रति आतंकवादलाई सहयोग नगर्न ध्यानाकर्षण गरेको बताए । उनले भने, ‘तर क्युवाले अन्तर्राष्ट्रिय आतंकवादलाई पटक–पटक सहयोग गर्दै आइरहेको छ । यसकारण अमेरिकाले यो सूचीमा पुनः राखेको हो ।’ अमेरिकाको यो कदमले क्युवालाई जिम्मेवार बन्न सहयोग पुग्ने पोम्पिओको भनाइ छ । साथै क्यास्ट्रो शासनले अन्तर्राष्ट्रिय आतंकवादलाई सहयोग नगर्ने र अमेरिकी न्याय व्यवस्थालाई क्षति नपुऱ्याउने अपेक्षा गरेको उनले बताए ।
यसअघि ओबामा प्रशासनले क्युवालाई यो सूचीबाट हटाएको थियो । यो सूचीमा क्युवालाई सामावेश गरेपछि क्युवासँग कारोबार गर्ने देशलाई पनि आमेरिकाले दण्डित गर्न सक्छ । साथै यो सूचीमा समावेश भएका राष्ट्रालाई अमेरिकाको कुनै पनि सहयोग हुँदैन । साथै सम्पूर्ण आयात–निर्यात पनि बन्द हुनेछ ।
