- वि.सं २o७७ मङ्सिर २९ सोमबार
ललितानिवासको सरकारी जग्गा व्यक्तिको नाममा दर्ता गरिएको भ्रष्टाचार मुद्दामा प्रतिवादी बनाइएका एक सय ७५ जनामध्ये सोमबारसम्म विशेष अदालतमा एक सयजना उपस्थित भएका छन् । सोमबार तीनजना उपस्थित भएसँगै हाजिर हुनेको संख्या सय पुगेको हो ।
सोमबार फणीन्द्रप्रसाद दाहाल, प्रेमबहादुर खापुङ र भवानी जोशी उपस्थित भएका थिए । जसमध्ये दाहाल र खापुङलाई जनही ५०–५० हजार रुपैयाँ धरौटीमा छाड्ने आदेश भएको छ भने जोशीलाई खोजेको बखत उपस्थित हुने गरी छाडिएको विशेषका उपरजिष्ट्रार पुष्पराज पाण्डेयले बताए ।
जोशीलाई जग्गा जफत गर्ने प्रयोजनका लागि मात्र प्रतिवादी बनाइएको हो । दाहाल भने तत्कालीन मालपोतमा नायव सुब्बाका रूपमा कार्यरत थिए । उनीमाथि सात करोड आठ लाख ४८ हजार रुपैयाँ बिगो मागदाबी गरिएको थियो ।
यसैगरी खापुङ मालपोत कार्यालय डिल्लीबजारमा अधिकृत थिए । उनीमाथि अख्तियारले नाै करोड ६५ लाख ७६ हजार रुपैयाँ माग गरेको थियो ।
आइतबार अदालतमा उपस्थित भएका अख्तियार दुरुपयोग अनुसन्धान आयोगका पूर्वप्रमुख आयुक्तलाई विशेषले थुनामा पठाउने आदेश दिएको थियो ।
