पूर्वी नवलपरासीको मध्यबिन्दु नगरपालिकामा– ९ मा थुम्कीदेवी ब्राइट फ्युचर इंलिस बोर्डिङ स्कुलको स्कुलबसको ठक्करबाट गम्भीर घाइते भएका तीनजनामध्ये एकजनाको मृत्यु भएको छ ।
मंगलबार बिहान मध्यबिन्दु नगरपालिका– ९ वसन्तपुरको भित्री सडक खण्डमा ग.१क २४८३ नम्बरको स्कुलबसले विपरीत दिशाबाट आउँदै गरेको लु.२०प २४३७ नम्बरको मोटरसाइकललाई ठक्कर दिँदा तीनजना गम्भीर घाइते भएका थिए ।
घाइतेमध्ये मध्यबिन्दु नगरपालिका– १३ निवासी ३५ वर्षीय सन्तबहादुर कुमालको निधन भएको हो ।
उनको उपचारको क्रममा भरतपुरमा निधन भएको जिल्ला प्रहरी कार्यालय नवलपुरका प्रहरी निरीक्षक मधु सिंहले बताए ।
दुर्घटनामा परी मध्यबिन्दु– १३ निवासी मनु विक, २६ वर्षीय तुलबहादुर खाम्चा गम्भीर घाइते भएका छन् ।
उनीहरूको पुरानो मेडिकल कलेजमा उपचार भइरहेको छ ।
ठक्कर दिने बस प्रहरी चौकी चोरमाराको नियन्त्रणमा रहे पनि चालक भने फरार रहेको प्रहरीले जनाएको छ ।