- वि.सं २o८३ श्रावण २९ शुक्रबार
नेपाल आयल निगमले ग्यासको अनावश्यक मौज्दात राख्ने होटेल, रेस्टुरेन्ट तथा पार्टी प्यालेसलगायतका व्यावसायिक प्रतिष्ठानलाई कारबाही गर्ने चेतावनी दिएको छ । बजार अनुगमन र उजुरीका आधारमा कतिपय होटेल, रेस्टुरेन्ट, पार्टी प्यालेसलगायतका व्यावसायिक प्रतिष्ठानमा आवश्यकताभन्दा बढी ग्यास सिलिन्डर मौज्दात राखिएको पाइएको भन्दै निगमले कारबाहीको चेतावनी दिएको हो ।
साबिकको भन्दा करिब २० प्रतिशत बढी ग्यास आयात भइरहँदा पनि उपभोक्ताले सहज रूपमा ग्यास नपाइरहेको गुनासोप्रति आफ्नो ध्यानाकर्षण भएको निगमले जनाएको छ ।
‘निगमको द्रुत प्रतिकार्य डेस्कमा प्राप्त उजुरी तथा जानकारीसमेतका आधारमा बजार अनुगमन गर्दा कतिपय होटेल, रेस्टुरेन्ट, पार्टी प्यालेसलगायतका व्यावसायिक प्रतिष्ठानहरूमा आवश्यकताभन्दा बढी ग्यास सिलिन्डर मौज्दात राखिएको पाइएको हुँदा त्यसरी अनावश्यक मौज्दात नराख्न तथा राखेको भए तत्काल सम्बन्धित डिपोमार्फत सर्वसाधारण उपभोक्तालाई बिक्री–वितरण गर्न–गराउन हुन निगम हार्दिक अपिल गर्दछ,’ निगमले जारी गरेको विज्ञप्तिमा उल्लेख छ ।
