- वि.सं २o८१ चैत २१ बिहीबार
हात्तीको आक्रमणमा परी बाँकेमा एकजनाको मृत्यु भएको छ । बाँके राष्ट्रिय निकुञ्जको खड्गवारस्थित हात्तीसारमा रहेको गणेशगज हात्तीले आक्रमण गर्दा माहुतेको मृत्यु भएको छ । हात्तीको आक्रमणमा परी ठाकुरबाबा नगरपालिका– ९ घर भई बाँके राष्ट्रिय निकुञ्जका माहुते ४५ वर्षीय आशाराम थारूको घटनास्थलमै मृत्यु भएको प्रमुख संरक्षण अधिकृत वीरेन्द्र कँडेलले जानकारी दिए ।
खड्वार हात्तीसारमा बुधबार राति ८:३० बजेतिर घाँस, दाना हाल्ने क्रममा १८ वर्षको गणेशगजले थारूलाई आक्रमण गरेको उनले बताए । ‘हात्तीले सुँढले हानेर त्यसपछि किचेर मार्याे,’ उनले भने ।
०७३ सालदेखि खड्गवारमा उक्त हात्तीको स्याहार गर्न थालेका उनले नै ०७३ सालमा गणेशगजलाई बर्दियाबाट ल्याएका हुन् । ‘केही दिनदेखि हात्तीमा मात चढेको संकेत देखिएको थियो,’ प्रमुख कँडेलले भने, ‘मात चढेपछि रिसाउने र आक्रमण गर्ने सम्भावना हुन्छ ।’
हात्तीको आक्रमणबाट मृत्यु भएका थारूको शव नेपालगन्ज मेडिकल कलेज शिक्षण अस्पताल कोहलपुरमा राखिएको प्रहरीले जनाएको छ । उनको शव पोस्टमार्टमपश्चात् परिवारलाई बुझाउने तयारी छ ।
