तेस्रो नेपाल सुपर लिग : झापा र काठमाडौंको दोस्रो बराबरी

झापा एफसी र काठमाडौं रेजर्सले तेस्रो नेपाल सुपर लिग (एनएसएल)को छैटौँ खेलमा गोलरहित बराबरी खेल्दै अंक बाँडेका छन् । त्रिपुरेश्वरस्थित दशरथ रंगशालामा बिहीबार भएको खेलमा दुवै टिमले गोल गर्न सकेनन् । दुवै टोलीले दुई खेलबाट समान २ अंक जोडेका छन् । लगातार बराबरीपछि दुवै टोलीलाई झड्का लागेको छ । 

अब, दुवै टोलीलाई प्लेअफमा स्थान बनाउन जित्नैपर्ने दबाब छ । पहिलो खेलमा काठमाडौंले साबिक विजेता ललितपुर सिटी एफसीसँग २–२ को बराबरी खेलेको थियो । झापाले भने बुटवल लुम्बिनी एफसीसँग पनि गोलरहित बराबरी खेलेको हो । खेलको प्लेयर अफ दी म्याच काठमाडौंका गोलकिपर अभिषेक बरालले फिनिसिङमा चुक्दा ३ अंक गुमाएको बताए । ‘३ अंकका लागि आएको थियौँ । तर, १ अंकमा चित्त बुझाउनुपर्‍यो । फाइनल थर्डमा खेलाडी आत्तिएजस्तो देखिन्थे,’ बरालले भने, ‘अर्काे खेल जित्नका लागि खेल्छौँ ।’ काठमाडौंले तेस्रो खेलमा पोखरा थन्डर्ससँग खेल्ने तालिका छ । 

दुवै टोली फिनिसिङमा चुके
प्रतियोगिताको छैटौँ खेलमा दुवै टोली फिनिसिङमा चुकेका छन् । दुवै टोलीले प्लेइङ सेटमै समान पाँच विदेशी खेलाडी उतारेका थिए । काठमाडौंले भने पुनः एकपटक गोलकिपरमा अभिषेक बराललाई विश्वास गरेको छ । मार्की रोहित कार्कीको कप्तानीमा खेलेको काठमाडौंले सेनेगलका गोलकिपर चेइख गुएलाई बेन्चमै राख्यो । अभिषेक नै खेलको उत्कृष्ट खेलाडी घोषित भएका छन् । 

यसअघि खेलको छैटौँ मिनेटमा बार बाधक बन्दा काठमाडौंले अग्रता बनाउने अवसर गुमायो । अमादोउ डियोपको प्रहार क्रसबारमा लागेर फर्किएको थियो । दोस्रो हाफको पहिलो मिनेटमै झापाले गोलको अवसर बनाए पनि सफल भएन । झापाका आर्षिक लाजारले १८ यार्ड बक्सबाहिरबाट गरेको प्रहारलाई काठमाडौंका गोलकिपर अभिषेकले पन्च गरेका थिए । इन्जुरी समयमा झापाको सुन्दर अवसरमा क्रसबार बाधक बन्यो । झापाका आरोन थापाको प्रहार बाहिरिएपछि झापा ३ अंकबाट चुकेको थियो । 

पोखरालाई जरिवाना, अफिसियललाई कारबाही 
रेफ्रीविरुद्ध जाइलागेका पोखरा थन्डर्सका अफिसियल सुन्दर थापालाई प्रतियोगिता अवधिभर रंगशाला प्रवेशमा प्रतिबन्ध लगाइएको छ । त्यस्तै, प्लेयर बक्समा आक्रोशित बनेका अफिसियल दीपक श्रेष्ठलाई पनि दुई खेलको प्रतिबन्ध लगाइएको छ । पोखरालाई भने ५० हजार जरिवाना गरिएको छ । बुधबार त्रिपुरेश्वरस्थित दशरथ रंगशालामा खेलको ८०औँ मिनेटमा गोलको विषयलाई लिएर प्यारापिटमा रहेका थापा रेफ्री किशनकन्हैया यादवसँग विवाद गर्न मैदानमा प्रवेश गरेका थिए । उनी सुरक्षा घेरालाई चुनौती दिँदै एफओबीविनै मैदानमा पुग्न सफल भएका थिए । 

मैदान पुगेर थापाले अखिल नेपाल फुटबल संघ (एन्फा) प्रतियोगिता निर्देशक सञ्जीव मिश्रलाई समेत तानेर लडाए । त्यसपछि पनि रेफ्रीमाथि अपशब्द प्रयोग गरे । यसअघि समीर तामाङको पासमा नवयुग श्रेष्ठको प्रहारलाई गोल नदिएको आरोप पोखराको थियो । त्यस्तै, आयोजक नेपाल स्पोर्टस् एन्ड इभेन्ट म्यानेजमेन्ट कम्पनीले थापाको एक्रिडेसन कार्ड चाँडै फिर्ता गर्न अनुरोधसमेत गरेको छ । विवादित खेलमा पोखरा ललितपुर सिटी एफसीसँग ३–२ ले पराजित भएको थियो ।