- वि.सं २o८१ चैत २२ शुक्रबार
रवि लामिछाने र छविलाल जोशीले जिल्ला अदालत, रुपन्देहीको थुनछेक आदेशविरुद्ध उच्च अदालतमा दिएको निवेदनमा आज आदेश आउने भएको छ। उच्च अदालत, बुटवलमा सुनुवाइ सकिएकाले शुक्रबार नै आदेश जारी गर्ने तयारी छ।
बुटवलको सुप्रिम सहकारीको ठगी मुद्दामा जिल्ला अदालतले जोशीलाई थुनामा पठाएको थियो भने लामिछानेसँग एक करोड धरौटी माग गरेको थियो । सो आदेशविरुद्ध दुवैजना उच्च गएका हुन्। सो सहकारीको ठगीमा आफू संलग्न नै नहुँदा पनि धेरै धरौटी मागिएको भन्दै लामिछानेले साधारण तारेखको माग गरेका छन् । उता जिल्ला सरकारी वकिल कार्यालय भने लामिछानेलाई थुनामै राख्न माग गरेर पनि उच्चमा गएको थियो।
उच्च अदालतका न्यायाधीशहरू रमेश ढकाल र स्वीकृति पराजुलीको इजलासमा सुनुवाइ सकिएको र आदेश लेख्ने काम भइरहेको उच्च अदालतले जनाएको छ।
