- वि.सं २o८१ चैत २२ शुक्रबार
राष्ट्रिय स्वतन्त्र पार्टीका सभापति रवि लामिछानेले आफूमाथि राज्यआतंक र धरपकड गरिएको भन्दै असन्तुष्टि जनाएका छन्। आफैँ गिरफ्तारी दिने बताउँदा पनि उच्च अदालतको आदेशलगत्तै प्रहरी घरमा पठाएकोमा उनले असन्तुष्टि जनाएका हुन्।
भिडियो सन्देश जारी गर्दै उनले भनेका छन्, ‘यो राज्यआतंक, यो धरपकड ममाथि के कारणले भइरहेको छ, बुझ्न सकेको छैन ।’ उच्च अदालतको आदेशअघि नै प्रहरीलाई तयारी अवस्थामा राखिएको हुन सक्ने उनको आशंका छ । आफू पक्राउ परे पनि शनिबार चितवनमा हुन लागेको जनयात्रा अभियान नरोक्न उनले आह्वान गरेका छन्।
सुप्रिम सहकारीको मुद्दामा उच्च अदालत बुटवलले उनलाई थुनामा पठाउने आदेश दिएलगत्तै हात्तीगौँडास्थित घरबाट प्रहरीले उनलाई नियन्त्रणमा लिएको हो । आज काठमाडौं परिसरको हिरासतमा राखी शनिबार रुपन्देही लैजाने प्रहरी तयारी छ।
