- वि.सं २o८१ चैत १८ सोमबार
आगामी २७ चैतमा सुदूरपश्चिम विश्वविद्यालय केन्द्रीय क्याम्पससहितका १५ आंगिक क्याम्पसमा स्वतन्त्र विद्यार्थी युनियनको निर्वाचनको मिति तय गरिएको छ । तर, सुदूरपश्चिम विश्वविद्यालय स्ववियु निर्वाचन समितिको कार्यालयमा तालाबन्दी भएको छ ।
१८ चैतमा उम्मेदवारी दर्ताको पूर्वसन्ध्यामा दुई विद्यार्थी संगठनले तालाबन्दी गरेका छन् । एकीकृत समाजवादीनिकट अनेरास्ववियू र नेकपानिकट अखिल समाजवादीले संयुक्त रूपमा निर्वाचन संयोजकको कार्यालयमा तालाबन्दी गरेका हुन् । अनेरास्ववियू र अखिल समाजवादीले वास्तविक विद्यार्थीलाई मतदानबाट वञ्चित गराउन खोजिएको भन्दै तालाबन्दी गरेको जनाएका छन् ।
अनेरास्वयूका संयोजक प्रज्वल कुँवर र अखिल समाजवादीका अध्यक्ष अनिल सीले संयुक्त विज्ञप्ति जारी गर्दै निर्वाचन भाँड्नैका लागि क्याम्पस प्रशासनले बदनियत रूपमा विद्यार्थीको नाम छुटाएको आरोप लगाएका छन् । छात्रवृत्ति पाएका विद्यार्थीको नामसमेत मतदाता नामावलीमा समावेश नहुँदा निर्वाचन स्वच्छ र निष्पक्ष हुन नसक्ने भन्दै वास्तविक विद्यार्थीलाई मतदान प्रक्रियामा समावेशको सुनिश्चितता नहुँदासम्म तालाबन्दी यथावत् रहने बताएका छन् ।
अनेरास्ववियू संयोजक कुँवरले वास्तविक विद्यार्थीलाई मतदान प्रक्रियाबाटै छुटाउने कार्यको विरोधस्वरूप तालाबन्दी गरिएको बताए । सुदूरपश्चिम विश्वविद्यालय निर्वाचन संयोजक कर्णदेव भट्टले विश्वविद्यालयका सबै संकायबाट प्राप्त नामावलीका आधारमा समितिले अन्तिम मतदाता नामावली प्रकाशन गरेको बताए । उनका अनुसार ३४ सय ६१ मतदाता नामावली टुंगो लागेको छ ।
सोमबार मनोनयन दर्ताका लागि आइतबार संगठन दर्ता गरेका विद्यार्थीलाई मनोनयन पत्र दर्ताकै प्रक्रियाकै दिन तालाबन्दी गरेपछि निर्वाचन प्रक्रिया रोकिएको छ । सुपवि स्थापनाको १४ वर्षमा हुन लागेको स्ववियु निर्वाचन तालाबन्दीले अन्योलतर्फ धकेलेको छ । स्ववियुका लागि तीन स्वतन्त्रसहित १० विद्यार्थी संघसंगठन चुनावी मैदानमा होमिएका थिए । अहिलेसम्म अखिल क्रान्तिकारीबाट हेमराज अवस्थी र अनेरास्ववियुबाट दीपकराज अवस्थी सभापतिमा लड्ने टुंगो लागेको छ ।
