एलपी ग्यास उद्योग संघद्वारा विभिन्न १९ बुँदे माग राख्दै आन्दोलन घोषणा

नेपाल एलपी ग्यास उद्योग संघले विभिन्न १९ बुँदे माग राख्दै आन्दोलन घोषणा गरेको छ । सरकारले संरक्षणको सट्टा उल्टै निरुत्साहित गर्ने रणनीति कायम राखेको भन्दै संघले बिहीबार पत्रकार सम्मेलन गरेर आन्दोलन गर्ने घोषणा गरेको हो । संघले ६ वर्षदेखि डिलर कमिसन, ढुवानी, ओभरहेड खर्च वृद्धि नभएकाले तत्कालै वृद्धि हुनुपर्ने र हरेक वर्ष मुद्रास्फीति दरअनुसार समायोजन गर्ने व्यवस्था गर्नुपर्ने माग राखेको छ । 

एलपी ग्यासको सिलिन्डरबाट हुने दुर्घटनाहरूमा निर्माता (उद्योग), उद्योगी, विक्रेता, उपभोक्ताको दायित्वबारे छुट्टाछुट्टै कानुनी व्यवस्था हुनुपर्ने माग पनि संघको छ । सिलिन्डर दुर्घटनाको अनुसन्धान तथा न्यूनीकरण गर्न प्राविधिकसहितको स्वतन्त्र अनुगमन समिति स्थायी रूपमा गठन गरिनुपर्ने पनि बताइएको छ । यसैगरी, ग्यास उद्योग मर्ज गर्ने नीति ल्याउनुपर्ने माग पनि गरिएको छ । आयात भएका ग्यासको गुणस्तरका विषयमा आयल निगम, उद्योगी, विक्रेता, उपभोक्ता अनभिज्ञ रहेकाले सात महिनाभित्र गुणस्तरीय ल्याबको स्थापना गर्नुपर्ने माग पनि राखिएको छ । 

यी माग सम्बोधन नभए ३० माघदेखि देशभरका ५९ वटै उद्योगले नेपाल आयल निगमबाट प्रोडक्ट डेलिभरी अडर (पिडिओ) नगर्ने संघको विज्ञप्तिमा छ ।