विपिन जोशीको रिहाइ प्रयास : इजरायली राष्ट्रपतिसँग राजदूतको फोनवार्ता

इजरायलका लागि नेपाली राजदूत धनप्रसाद पण्डितले हमासद्वारा बन्धक बनाइएका नेपाली नागरिक विपिन जोशीको रिहाइका लागि इजरायली राष्ट्रपति इसाक हरजोगसँग टेलिफोन संवाद गरेका छन् । बुधबार अपराह्न भएको फोनवार्तामा इजरायली राष्ट्रपति हरजोगले नेपाली नागरिक जोशीसहित हमासको बन्धक अवस्थामा रहेका सबैलाई सुरक्षित मुक्त गर्न हरसम्भव प्रयास भइरहेको जवाफ दिएका छन् । 

जोशी २० असोज ०८० देखि हमास समूहको नियन्त्रणमा छन् । हमासको नियन्त्रणमा रहेका पाँचजना थाई नागरिकको मुक्तिसँगै जोशी मुक्त हुने आशा नेपाल सरकारको छ । परराष्ट्रमन्त्री डा. आरजु राणा देउवाले पनि यसअघि इजरायलका समकक्षी गिडिओन सारसँग जोशी रिहाइको प्रयास गरिदिन टेलिफोनमा कुराकानी गरेकी थिइन् ।

‘जोशी जीवित छन् र उनको उद्धारको प्रयास जारी छ भन्ने सन्देश इजरायलबाट आएको हुनाले हामी आशावादी छौँ,’ परराष्ट्रका एक उच्च अधिकारीले भने । नेपाली कूटनीतिक अधिकारीहरूका अनुसार जोशी २३ माघसम्म छुटिसक्ने विश्वास इजरायली कूटनीतिक च्यानलबाट प्राप्त भएको थियो । तर, यो सम्भव भएन । यद्यपि, ती अधिकारीले भने, ‘हामी प्रयासरत छौँ र आशावादी पनि छौँ ।’ 

प्यालेस्टाइनको गाजास्थित हमास समूहको नियन्त्रणबाट तेस्रो समूहअन्तर्गत १७ माघमा पाँचजना थाई र तीनजना इजरायली नागरिक मुक्त भएका थिए । इजरायल र प्यालेस्टिनी हमास समूहबिच ३ माघमा भएको युद्धविराम सम्झौताअनुसार हमास समूहले ६ साताभित्र उसको नियन्त्रणमा रहेका ३३ जनालाई नियन्त्रणमुक्त गर्नुपर्नेछ । यसलाई पहिलो चरण भनिएको छ । यो चरणमा इजरायली नागरिक मात्रै नियन्त्रणमुक्त हुने भनिएको भए पनि बिहीबार पाँचजना थाई नागरिकसमेत मुक्त भए । त्यसमा नेपाली विपिन पनि मुक्त हुने आशा थियो । 

युद्धविराम सम्झौताअनुसार हमासले १९ जनवरीमा तीनजना, २५ जनवरीमा चारजना र बिहीबार आठजना गरी १५ जनालाई मुक्त गरिसकेको छ । १९ जनवरीदेखि लागू हुने गरी ६ साता अर्थात् फेब्रुअरीभित्र हमासले ३३ जनालाई मुक्त गर्ने प्रतिबद्धता जनाएको छ । त्यतिन्जेल इजरायलको जेलमा रहेका करिब दुई हजार प्यालेस्टिनी नागरिक पनि मुक्त हुनेछन् ।