- वि.सं २o८१ माघ २४ बिहीबार
ललितपुरस्थित ग्वार्काे चोकमा निर्माणाधीन ‘फ्लाई ओभर’ परियोजनाको निर्माण कार्य एक महिनादेखि अलपत्र पारेको ठेकेदार कम्पनी काममा फर्किएको छ । इपिसी (इन्जिनियरिङ प्रोक्योर्मेन्ट एन्ड कन्स्ट्रक्सन) मोडेलमा ठेक्का प्राप्त आरसी, समानान्तर र रेलिग्रे जेभीले पछिल्लो एक महिनादेखि परियोजनाको निर्माण कार्य ठप्प पारेका थिए । मंगलबारदेखि आंशिक रूपमा काम सुरु गरेको कम्पनीले बुधबार ‘नोटिस टु करेक्ट’ पत्रको जवाफ पनि एक पानामा सडक विभागलाई बुझाएको छ ।
कुनै जानकारी नदिई काम छोडेको देखेपछि विभागले माघ पहिलो साता कम्पनीलाई ठेक्का तोडेर कालोसूचीमा राख्ने चेतावनीसहित ‘नोटिस टु करेक्ट’ पत्र पठाएको थियो । त्यसको जवाफ सात दिनभित्र नआएपछि विभागले १५ माघमा दोस्रोपटक कम्पनीलाई ‘नोटिस टु करेक्ट’ पत्र पठाएको थियो । बुधबार त्यसको जवाफ पेस गर्दै कम्पनीले मंगलबारदेखि काम सुरु गरेको र बाँकी काम आवश्यक तयारी पूरा गरेर गर्ने जानकारी दिएको छ ।
सडक विभागका सिनियर डिभिजनल इन्जिनियर प्रदीप भण्डारीले पनि निर्माण कम्पनीबाट पत्र प्राप्त भएको बताए । ‘कम्पनीले एक पानाको जवाफ पेस गरेको छ । त्यसमार्फत मंगलबारदेखि नै काम सुरु गरेको जानकारी दिएको छ । बाँकी काम पनि आवश्यक तयारी पूरा गरेर सुरु गर्ने बताएको छ,’ उनले भने ।
कम्पनीले विभागबाट औँल्याइएका त्रुटि सच्चाउने योजना बनाउन काम रोकेको जवाफ दिएको छ । अब विभागले औँल्याएका त्रुटि सच्चाएर काम गर्ने कम्पनीको प्रतिबद्धता छ । विभागले कम्पनीलाई फ्लाई ओभरबाट सातदोबाटोतर्फ झन्डै ४० मिटर र्याम्प (फ्लाई ओभर र सडकलाई जोड्न बिचमा माटो भरेर निर्माण गरिएको विशेष संरचना)मा त्रुटि देखिएपछि विभागले त्यसलाई पुनःनिर्माण गर्न भनेको थियो । त्यसको पुनःनिर्माणका लागि योजना बनाउन काम रोक्नुपरेको बताइएको छ । मंगलबारदेखि कम्पनीले त्यहाँको माटो, कंक्रिट प्यानल तथा ब्लक झिक्न सुरु गरेको छ ।
यस्तै, कम्पनीले बुधबार नै एप्रोच ट्रयाक (पुल र पर्खालबिच हुने स्ल्याब)को डिजाइन पनि पेस गरेको छ । त्यो डिजाइन विभागबाट स्वीकृत भएपछि निर्माण सुरु गर्ने प्रतिबद्धता कम्पनीले गरेको छ । साथै, आकासे पानीलाई व्यवस्थापन गर्नेलगायतको संरचनाको अन्तिम डिजाइन भने छिट्टै पेस गरिने कम्पनीको जवाफ छ ।
सम्झौताअनुसार कम्पनीले १२ फागुन ०८० भित्र फ्लाई ओभरको निर्माण गरिसक्नुपर्ने थियो । तर, त्यस अवधिमा काम नसकिएपछि विभागले असार ०८१ सम्म म्याद थप गरिदिएको थियो । त्यस अवधिमा पनि काम नभएपछि अन्तिम मौकास्वरूप ९ पुस ०८१ सम्म म्याद थप गरिएको थियो । अन्तिम अवधिमा पनि काम नसकिएपछि कम्पनीले १० पुसयता हर्जाना तिरेर काम गरिरहेको छ । यसमा कम्पनीले ठेक्का रकमको १० प्रतिशतसम्म जरिवाना तिर्नुपर्छ, जुन एक करोड ७० लाख रुपैयाँ हाराहारी हुन आउँछ । हर्जाना लाग्ने मितिबाट २०० दिनभित्र कम्पनीले काम सम्पन्न गरिसक्नुपर्नेछ ।
