कर्णाली स्वास्थ्य विज्ञान प्रतिष्ठानमा अनिश्चितकालीन तालाबन्दी

कर्णाली स्वास्थ्य विज्ञान प्रतिष्ठान जुम्लाका कर्मचारीले प्रतिष्ठानको शैक्षिक र प्रशासनिक भवनमा ताला लगाएका छन् । स्तरवृद्धिको माग सम्बोधन नभएको भन्दै ५८ जना शिक्षक कर्मचारीले प्रतिष्ठानमा तालाबन्दी गरेका हुन् ।

कर्मचारीले प्रतिष्ठानको शैक्षिक तथा प्रशासनिक भवनमा तालाबन्दी गरेपछि विद्यार्थीको नियमित पठनपाठन प्रभावित भएको छ । पदाधिकारीको कार्यकक्षमा पनि तालाबन्दी हुँदा काम ठप्प भएको छ ।

प्रतिष्ठानमा करिब चार सय शिक्षक कर्मचारी कार्यरत छन् । जसमध्ये ७०–७५ जना मात्रै स्थायी छन् भने ठुलो संख्यामा करार र ज्यालादारी कर्मचारी कार्यरत रहेका छन् । विगत लामो समयदेखि प्रतिष्ठानमा कार्यरत कर्मचारीलाई स्थायी प्रक्रिया अघि नबढाइनु, अदालतले समेत आन्दोलनरत कर्मचारीको पक्षमा समेत फैसला गरिसक्दा र जुम्लामा बसेको सिनेट बैठकले आन्दोलनरत कर्मचारीको मागलाई सम्बोधनको प्रक्रिया अघि बढाउने निर्णय गर्दासमेत प्रतिष्ठानका पदाधिकारीले कार्यान्वयनमा आनाकानी गरेपछि तालाबन्दी गर्नुपरेको आन्दोलनरत कर्मचारीले बताएका छन् ।

२०८० भदौ २१ गते कर्मचारीहरूले आन्दोलन गरेर दुईपक्षीय सम्झौता गरेका थिए । जसमा असोज ८ गते बढुवापत्र प्रदान गरिएको थियो। तर, अन्य बाँकी स्थायी कर्मचारीहरूको स्तरवृद्धि प्रक्रिया ०८० असोज १ गतेबाट अगाडि बढाउने सहमति कार्यान्वयनमा ढिलाइ भएको आरोप कर्मचारीले लगाएका छन्।

यस विषयमा अदालतले ०८१ भदौ २६ गते कर्मचारीहरूको पक्षमा निर्णय सुनाएपछि पनि कार्यान्वयन नभएको आन्दोलनरत शिक्षक तथा कर्मचारीहरूले बताएका छन्।

अदालतको फैसलादेखि सिनेट बैठकले समेत आन्दोलनरत कर्मचारीको माग सम्बोधनलाई अघि बढाउने निर्णय गरे पनि गत कात्तिक २७ गते पुनः वार्ता भएको र २८ जनाको स्तरवृद्धि गर्ने निर्णय भएकोमा कात्तिक २८ गतेको बैठकले निर्णय अनुमोदन गर्न आनाकानी गरेपछि प्रतिष्ठानमा तालाबन्दी गर्न बाध्य भएको कर्मचारीहरूले बताएका छन् ।

आफ्ना माग सम्बोधन नभएपछि आगामी मंसिर ५ गतेसम्म कर्मचारीले विभिन्न आन्दोलनका कार्यक्रम सार्वजनिक गरेका छन् । ४८ घण्टाभित्र निर्णय कार्यान्वयन नभएमा अस्पतालका आकस्मिक सेवाबाहेक सबै सेवा बन्द गर्ने चेतावनीसमेत दिएका छन् । कर्मचारीले आफ्ना माग सम्बोधन र निर्णय कार्यान्वयन गर्न ४८ घण्टे अल्टिमेटम दिएका छन् ।